Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 102 Hüküm no: 59 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Abdullah oğlu el-Hac Mustafa’nın terekesine vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Düğmecibaşı mahallesinde sâkin iken bundan akdem vefât eden el-Hâc Mustafa b. el-Hâc Abdullah’ın ber-vech-i âtî vasiyy-i muhtârı olduğunu iddi‘â eden işbu râfi‘u’l-kitâb Veli Çelebi b. Ali meclis-i şer‘-i şerîf-i enverde müteveffâ-yı mezbûrun zevce-i menkûha-i metrûkesi ve babası ve terekesine bi’l-verâse vâzı‘u’l-yed olan Fâtıma Hatun bt. Veli babası mezbûr el-Hâc Abdullah b. Abdullah mahzarlarında üzerlerine da‘vâ ve takrîr-i kelâm edip müteveffâ-yı mezbûr el-Hâc Mustafa b. el-Hâc Abdullah b. Abdullah hâl-i marazında fevtinden iki gün mukaddem bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüldükden sonra terekemin sülüsü ifrâz oluna ve bin akçesi iskāt-ı salâtım için fukarâya tasadduk oluna ve dört bin sekiz yüz akçe ile dört Mushaf-ı şerîf iştir[â] olunup vakf oluna ve üç bin akçe ile eyyâm-ı mu‘tâdede tabh-ı ta‘âm ve it‘âm-ı fukarâ oluna ve iki bin dört yüz akçe ile sekiz hatm-i şerîf tilâvet olunup rûhuma ihdâ oluna ve on iki bin akçe ile sulbî sagīr oğulları Ali ve Mehmed Emin ve Mes‘ud’un hitânlarına sarf oluna ve fazla kalırsa vücûh-ı birre sarf oluna deyu vasiyet ve tenfîzine beni vasiyy-i muhtâr nasb ve ta‘yîn edip ben dahi muvâcehesinde vesâyet-i merkūmeyi ba‘de’l-kabûl mezbûr el-Hâc Mustafa musırran aleyhâ vefât etmekle tenfîz-i vesâyâ murâd eylediğimde mezbûrân Fâtıma Hatun ve el-Hâc Abdullah mâni‘ olurlar suâl olunsun dedikde gıbbe’s-suâl mezbûrân Fâtıma Hatun ve el-Hâc Abdullah cevâblarında fi’l-hakīka tereke-i müteveffâ-yı mezbûra bi’l-verâse vaz‘-ı yedlerini ikrâr lâkin müdde‘î-i mezbûrun vesâyetini inkâr edicek mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup medîne-i mezbûrede Şahsultan mahallesinde [23a] sükkânından Hüseyin Çelebi b. Mustafa ve Zeynep Hatun mahallesi sükkânından Ahmed b. Mehmed ve sâlifü’z-zikr Düğmecibaşı mahallesi sükkânından Ali Çelebi b. Veli ve es-Seyyid Necmi b. Abdullah nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr el-Hâc Mustafa b. el-Hâc Abdullah b. Abdullah hâl-i marazında fevtinden iki gün mukaddem bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere techîz ve tekfînim görüldükden sonra bâkī terekemin sülüsü ifrâz oluna ve bin akçesi iskāt-ı salâtım için fukarâya tasadduk oluna ve dört bin sekiz yüz akçe ile dört Mushaf-ı şerîf iştirâ olunup vakf oluna ve üç bin akçe ile eyyâm-ı mu‘tâdede tabh-ı ta‘âm ve it‘âm-ı fukarâ oluna ve iki bin dört yüz akçe ile sekiz hatm-i şerîf tilâvet olunup rûhuma ihdâ oluna ve on iki bin akçe ile sulbi sagīr oğullarım Ali ve Mehmed Emin ve Mes‘ud’un hitânlarına sarf oluna ve bâkī kalırsa vücûh-ı birre harc ve sarf oluna deyu vasiyet ve tenfîzine müdde‘î-i mezbûr Veli Çelebi’yi vasiyy-i muhtâr nasb ve ta‘yîn edip ol dahi muvâcehesinde vesâyet-i mezbûreyi ba‘de’l-kabûl mezbûr el-Hâc Mustafa musırran aleyhâ vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sâdis min-Ramazâni’l-mübârek li-sene tis‘a ve ışrîn ve mi’e ve elf. Şuhûdü’l-hâl: Es-Seyyid eş-Şeyh Hüseyin Efendi b. es-Seyyid Şükrullah Efendi, Mustafa Efendi b. Hüseyin, Mehmed Efendi b. Mustafa, Hüseyin Çelebi b. Hasan tüfengî, el-Hâc Ali b. Ahmed tüfengî, el-Hâc Mehmed b. tüfengî, Abdullah Çelebi. b. Ali.