Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 103 Hüküm no: 60 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Abdullah oğlu el-Hac Mustafa’nın terekesi ve taksimi Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Düğmecibaşı mahallesinde sâkin iken bundan akdem vefât eden el-Hâc Mustafa b. el-Hâc Abdullah’ın terekesinin sülüsünden vesâyâsını tenfîze bâ-hüccet-i şer‘iyye vasiyy-i muhtârı olan kayın babası Veli Çelebi b. Ali ber-mûceb-i defter-i kassâm-ı askerî tereke-i müteveffâ-yı mezbûrdan kabz eylediği sülüs ve masârıf defteridir ki ber-vech-i âtî zikrolunur. Fi’l-yevmi’s-sâdis min-Ramazâni’l-mübârek li-sene tis‘a ve ışrîn ve mi’e ve elf. Vasiyy-i mezbûrun ber-mûceb-i defter-i kassâm-ı askerî Sülüs makbûzu 43.405 akçe Minhe’l-masârıf Techîz ve tekfîn 4000 akçe Iskāt-ı salât 1001 akçe Vakf olmak üzere dört Kelâm-ı kadîm 4800 akçe Hîn-i fevtinde tasadduk-ı fukarâ 1424 akçe Berây-ı hatm-i şerîf ulemâdan sekiz nefer kimesneye 300 akçe Fevti günü helvaya masraf 300 akçe Üçüncü günü it‘âm-ı fukarâya masrûf 500 akçe [23b] Kabri için masrûf 800 akçe Sa‘d Tekkesi’nin şeyhi ile fukarâsına verilen 2400 akçe Sünne Hatun mektebine sıbyân için ıydiyye mest babuc 2000 akçe Hoca ve halîfe için mest babuc 240 akçe Es-Seyyid Necmi nâm fakīre verilen 1500 akçe Derviş Ali nâm fakīre verilen 1500 akçe Derviş Hüseyin nâm fakīre verilen 1500 akçe Ma‘rifet-i şer‘iyye ile fukarâya tevzî‘ olunan 1400 akçe Vasiyy-i mezbûrun akrabâsından Ali nâm fakīre verilen 600 akçe Es-Seyyid Mustafa nâm fakīre verilen 360 akçe Mustafa Efendi için verilen 360 akçe Sünne Hatun mektebine alınan sıbyân için 360 akçe Harc-ı defter 360 akçe Kâtibiyye 120 akçe Muhzıriyye ve hüddâmiye 200 akçe Kaydiyye 40 akçe Cem‘an yekûn el-masârıf 29.205 akçe Meblağ-ı mezbûrdan ber-mûceb-i vasiyet kırkında ve senesi için iki bin iki yüz akçe ve müteveffâ-yı mezbûrun evlâd-ı sıgārı Ali ve Mes‘ud ve Mehmed Emin’in hîn-i hitânlarında sarf oluna deyu vasiyete on iki bin akçe ki min-haysü’l-mecmû‘ on dört bin iki yüz akçe vasiyy-i mezbûr zimmetinde bâkī kalmağla bu mahalle şerh verildi. Cem‘an yekûn-i sülüs 43.405 Defterde mastûr olduğu üzere meblağ on dört bin iki yüz akçeden mâ‘adâ vasiyy-i mezbûr Veli Çelebi yedinde ve zimmetinde bir akçe ve bir habbe bâkī kalmayıp vech-i şer‘î üzere tahlîf olunduğu bu mahalle şerh verildi.