Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 106 Hüküm no: 62 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed kızı Fatıma Hatun’un çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahalle[sinde] sâkine iken bundan akdem vefât eden Fâtıma Hatun bt. Ahmed’in sadrî sagīr oğlu İsmail b. Mehmed ve sadriye sagīre kızı Ümmühani bt. Süleyman’ın tesviye-i emrlerine kıbel-i şer‘den mansûb vasîleri olan işbu râfi‘u’l-kitâb merkūm Mehmed b. Himmet meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîleri olduğum sagīrân-ı mezbûrân İsmail ve Ümmühani’nin nafaka ve kisve bahâya eşedd-i ihtiyâcları olmağla vâlideleri müteveffât-ı mezbûreden müntakil mâllarından her birine kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın vâlideleri müteveffât-ı mezbûreden müntakil mâllarından her birine yevmî altışar akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīrân-ı mezbûrân İsmail ve Ümmühani’nin nafaka ve kisve bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyy-i mezbûr Mehmed’e izin birle mâ-vaka‘a bi’t-taleb ketbolundu Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf Şuhûdü’l-hâl: Mehmed Efendi b. Ahmed imâm, Mehmed Çelebi b. Hızır, Osman Çelebi b. Mustafa, Ali Çelebi b. Mehmed, es-Seyyid Mustafa b. Sefer.