Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 107 Hüküm no: 64 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu Şahin Odabaşı’nın terekesinden kalan menzilin annesi Ümmü Gülsüm’e devredildiği Medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Câmi‘-i Kebîr mahallesinde sâkin iken bundan akdem vefât eden Şahin Odabaşı b. Abdullah b. Abdurrahman’ın verâseti sulbî sagīr oğlu Mustafa ile sulbiye sagīre kızı Âişe [ve] sulbiye kebîre kızı Fâtıma’ya münhasıra ve tashîh-i mes’elesi dört sehimden olup sihâm-ı mezbûreden iki sehm sagīr-i mezbûr Mustafa’ya ve bir sehmi kızları mezbûretân Âişe ve Fâtıma’ya isâbeti tahkīkinden sonra mezbûre Fâtıma tarafından husûsü’l-beyânı vekîl olduğu zâtı mezbûru bi’l-ma‘rifeti’ş-şer‘iyye ârifân el-Hâc Ali Efendi b. Receb ve Mehmed Çelebi b. Hüseyin nâm kimesneler şehâdetleriyle şer‘an sâbit ve sübût-ı vekâlete hükm-i şer‘î lâhık olan Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müvekkilem mezbûrenin vâlidesi işbu sâhibetü’l-kitâb Ümmü Gülsüm bt. Abdullah nâm hatun mahzarında ikrâr ve takrîr-i kelâm edip müvekkilem mezbûrenin yedinde mülk-i mevrûsu olup mahalle-i mezbûrede vâki‘ bir tarafı ba‘zan Şatır Halil Çelebi ve ba‘zan Mehmed Çelebi mülkü ve bir tarafı Abdi Çavuş bahçesi ve bir tarafı tarîk-ı âm ve bir tarafı tarîk-ı hâs ile mahdûd tabaka-i ulyâsında nîm sofalı bir bâb oda ve dehlîz ve tahta-pûş ve matbah ve vüstâsında bir bâb oda ve dehlîz ve bir kenîf ve bi’r-i mâ ve bahçeyi müştemil menzilde olan rub‘ sehm hissesini müvekkilem mezbûrenin vâlidesi mezbûre Ümmü Gülsüm Hatun’a cihet-i deyn-i şer‘îden olmak üzere yüz guruş mukābelesinde rub‘ hissesini takās edip ol dahi mukāsa ve kabûl edip sihâm-ı mezbûrdan müvekkilem mezbûrun alâka ve medhali kalmadı vâlidesi mezbûrenin mülk-i müşterâsıdır keyfemâ-teşâ mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’l-hâmis min- i’l-hicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Celeb Hasan Ağa b. Abdülmennan, Molla Mehmed b. Ali Efendi, Hüseyin Çelebi b. Mehmed, es-Seyyid Mustafa b. Sefer, Mehmed Çelebi b. Hasan Efendi, es-Seyyid Abdurrahman b. Receb, Berber Osman Çelebi ve gayruhüm.