Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 108 Hüküm no: 65 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Hasan oğlu Mehmed Çelebi’nin Mehmed oğlu Mehmed Ağa’dan alacağının talebi Husûs-ı âti’l-beyânın mahallinde istimâ‘ ve iltimâs olunmağın bu fakîr medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Cezerî Kasımpaşa mahallesinde sâkin iken bundan akdem vefât eden Mehmed Çelebi b. Hasan b. Hüseyin nâm kimesnenin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i nebevî olundukda mahalle-i mezbûrda sâkine müteveffâ-yı mezbûrenin vâlidesi zâtı ba‘de’t-ta‘rîfi’ş-şer‘î mu‘arrefe olan işbu bâ‘isetü’l-kitâb Emine bt. Abdullah nâm hatun meclis-i mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘u’l-yed Mehmed Ağa b. Mehmed nâm kimesne mahzarında üzerine da‘vâ ve takrîr-i kelâm edip oğlum müteveffâ-yı mezbûr Mehmed Çelebi’ye hâl-i hayâtında ve kemâl-i akl ve sıhhatinde târîh-i kitâbdan sekiz sene mukaddem cihet-i karz-ı şer‘î olmak üzere yedinden yüz altmış guruş idâne ve teslîm ve ol dahi istidâne ve kabz eyledim dedi biz bu husûsa bu vech üzere şâhidleriz ve şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm vasiyy-i mezbûr Mehmed Ağa’ya meblağ-ı mezbûru edâya tenbîh birle mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: El-Hâc Mustafa b. Sefer, Süleyman Çelebi b. Mehmed ve gayruhüm.