Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 115 Hüküm no: 73 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan oğlu Mehmed Çelebi’nin terekesinden zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîri iltimâs olunmağın bu fakîr medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Cezerî Kasımpaşa mahallesinde sâkin iken bundan akdem vefât eden Mehmed Çelebi b. Hasan nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde zâtı ba‘de’t-ta‘rîfi’ş-şer‘î mu‘arrefe olan işbu sâhibetü’l-kitâb müteveffâ-yı mezbûrun zevce-i menkûhası olan Âişe bt. Hasan nâm hatun meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla bi’l-vesâye vâzı‘u’l-yed olan Mehmed Ağa b. Mehmed nâm kimesne mahzarında [27a] üzerine da‘vâ ve takrîr-i kelâm edip müteveffâ-yı mezbûr zevcim Mehmed Çelebi târîh-i kitâbdan beş sene mukaddem beni huzûr-ı Müslimînde altı bin akçe mehr-i müeccel tesmiyesiyle akd-i nikâh edip ve târîh-i kitâbdan üç sene mukaddem cihet-i karz-ı şer‘î olmak üzere huzûr-ı Müslimînde zevcim mezbûr Mehmed Çelebi’ye kendi mâlımdan kırk guruş idâne ve teslîm ol dahi yedimden istidâne ve kabz eyledikden sonra kable’l-edâ fevt olmağın tereke-i vâfiyesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûrdan müdde‘âsına beyyine taleb olundukda udûl-i ahrâr-ı Müslimînden olup mahalle-i mezbûre imâmı el-Hâc İbrahim Efendi b. Mehmed Efendi ve Hasan Çelebi [b.] İsmail nâm kimesneler li-ecli’ş-şehâde meclis-i ma‘kūd-ı mezkûrda hâzırân olup istişhâd olundukda fi’l-hakīka müteveffâ-yı mezbûr Mehmed Çelebi b. Hasan b. Hüseyin hâl-i hayâtında ve kemâl-i akl-ı sıhhatinde târîh-i kitâbdan beş sene mukaddem altı bin akçe mehr-i müeccel tesmiyesiyle akd-i nikâh eyledi ve cihet-i karz-ı şer‘î olmak üzere müteveffâ-yı mezbûrun yedinde kırk guruş idâne ve teslîm ol dahi yedinden istidâne ve kabz eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın müdde‘iye-i mezbûre müteveffâ-yı mezbûrun hâl-i hayâtında yedinden küllen ve ba‘zan ahz u kabz ve yahud âhara havâle ve zimmetini ibrâ etmediğine ba‘de’t-tahlîfi’ş-şer‘î mûcebiyle ba‘de’l-hükm vasiyy-i mezbûr Mehmed Ağa’ya meblağ-ı merkūm kırk guruşu ve mehr-i müeccel-i mezkûru müdde‘iye-i mezbûra edâya tenbîh birle mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: El-Hâc Mustafa b. Sefer, Süleyman Çelebi b. Mehmed, Mustafa Çelebi b. Mehmed, Mehmed Çelebi b. el-Hâc Abdullah ve gayruhüm.