Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 118 Hüküm no: 76 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram oğlu el-Hac Mehmed’in kızının vasisine nâzır tayini Medîne-i hazret-i Ebâ Eyyüb Ensârî -radıye anhu Rabbühü’l-Bârî- mahallâtından Evlice Baba mahallesinde sâkin iken bundan akdem vefât eden el-Hâc Mehmed b. Bayram’ın sulbiye sagīre kızı Hanife’nin tesviye-i umûruna bâ-hüccet-i şer‘iyye vasiyye-i muhtâresi olan zevcesi Fâtıma bt. Hasan’ın üzerine kıbel-i şer‘den bir hasbî nâzır lâzım ve mühim olmağla emânet ile ma‘rûf ve diyânet ile mevsûf her vechile nezâret uhdesinden gelmeğe kādir idiği zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olan sagīre-i mezbûrenin ammisi oğulları işbu râfi‘u’l-kitâb el-Hâc Ahmed ve Ali Çelebi b. el-Hâc Hasan nâm kimesneleri hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin vasiyye-i muhtâresi olan mezbûre Fâtıma Hatun’un üzerine hasbî nâzır nasb ve ta‘yîn buyurduklarında anlar dahi her biri nezâret-i mezbûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeleriyle mâ-vaka‘a bi’t-taleb ketbolundu. Fi’l-yevmi’s-sâlis min-Muharremi’l-harâm sene 1130 Şuhûdü’l-hâl: İsmail Çelebi b. el-Hâc Osman, İmâm Mehmed Efendi b. Ahmed, Müezzin Osman Çelebi b. Mustafa, Hüseyin Çelebi b. el-Hâc Mustafa, Ali Beşe b. Mustafa, Ömer Çelebi b. Mustafa, Muhsin Çelebi b. Mustafa, Ketenci Mehmed Çelebi b. el-Hâc Mustafa ve gayruhüm.