Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 117 Hüküm no: 75 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadika-i Hassa ustalarından Süleyman oğlu Ömer Ağa’nın çocuklarına nafaka takdiri Havâss-ı aliyye kazâsı muzâfâtından Silivri kasabasına tâbi‘ Yapağıcı nâm karyede sâkin iken bundan akdem vefât eden hadîka-i hâssa ustalarından karye hadîkası ustası Ömer Ağa b. Süleyman nâm kimesnenin sulbî sagīr oğulları Orhan ve Ömer ve sulbiye sagīre kızları Fâtıma ve Ümmü Gülsüm’ün vâlideleri ve tesviye-i umûrlarına kıbel-i şer‘den mansub vasîleri olan işbu sâhibetü’l-kitâb Âişe bt. el-Hâc Süleyman Efendi nâm hatun meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip vasîleri olduğum sıgār-ı mezbûrûnun nafaka ve kisve bahâya eşedd-i ihtiyâcları olmağla babaları müteveffâ-yı mezbûrdan müntakil mâllarından kadr-i ma‘rûf nafaka ve kisve bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleri ile lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sıgār-ı mezbûrûnun babaları müteveffâ-yı mezbûrdan müntakil mâllarından kadr-i ma‘rûf her birine yevmî onar akçe nafaka ve kisve bahâ farz ve takdîr buyurup meblağ-ı mefrûz-ı mezbûru sıgār-ı mezbûrûnun nafaka ve kisve bahâsına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyye-i mezbûre Âişe Hatun’a izin birle mâ-vaka‘a bi’t-taleb ketbolundu. Fi’l-yevmi’s-sâbi‘ aşer min-Zilka‘deti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Muslihiddin Efendi b. el-Hâc Musa, Davud Paşa Ustası Musa Ağa b. Ahmed, Silivri Ustası Mustafa b. Ali, Mustafa Efendi b. Ali, el-Hâc Mustafa Ağa b. Ali, Süleyman Efendi b. İbrahim ve Ali Çelebi b. el-Hâc Süleyman ve gayruhüm.