Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 129 Hüküm no: 83 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram oğlu el-Hâc Mehmed’in terekesinden olan mülkün zevcesine devri Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahallesinde sâkin iken bundan akdem vefât eden el-Hâc Mehmed b. Bayram’ın ile’l-vefât yedinde mülk olan menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûr el-Hâc Mehmed b. Bayram’ın verâseti zevce-i menkûha-i metrûkesi Fâtıma Hatun bt. Hüseyin ile sulbiye kızı sagīre Hanife ve li-ebeveyn er karındaşı oğulları el-Hâc Ahmed ve Ali b. Hasan’a münhasıra ve tashîh-i mes’elesi kırk sekiz sehimden olup sihâm-ı mezbûreden altı sehmi zevcesi mezbûre Fâtıma Hatun’a ve yirmi dört sehmi kızı sagīre-i mezbûre Hanife’ye ve bâkī on sekiz sehmin dokuzar sehmi mezbûrân el-Hâc Ahmed ve Ali’den her birine isâbeti tahkīkinden sonra mezbûrân el-Hâc Ahmed ve Ali meclis-i ma‘kūd-ı mezkûrda zâtı ta‘rîfü’ş-şer‘î ile mu‘arrefe olup müteveffâ-yı mezbûrun zevce-i menkûha-i metrûkesi işbu bâ‘isü’l-kitâb mezbûre Fâtıma Hatun mahzarında her biri ikrâr ve takrîr-i kelâm edip mahalle-i mezbûrda vâki‘ bir tarafı Câbî Mehmed Çelebi mülkü ve bir tarafı el-Hâc Mehmed menzili ve bir tarafı Yağcızâde vakfı ve taraf-ı âharı tarîk-ı âm ile mahdûd olup dâhilinde üç bâb fevkānî oda ve bir dehlîz ve bir kenif ve tahtânî bir hamâm ve bir câmekân odası ve su mahzeni ve bir kenif ve bir ahur ve bi’r-i mâ ve bir matbah ve eşcâr-ı müsmire ve gayr-ı müsmireyi müştemil bir mikdâr bahçe ve hâriciyesinde tahtânî bir oda ve bir havuz ve bir sofayı müştemil mülk menzilin ale’l-iştirâki’s-seviy nısfı mezbûre Fâtıma Hatun’un mülkü ve nısf-ı âharı dahi mevrûsumuz müteveffâ-yı mezbûr el-Hâc Mehmed b. Bayram’ın ile’l-vefât yedinde mülkü ve hakkı olmağla menzil-i mezbûrun nısfından tashîh-i merkūm üzere isâbet eden dokuz sehm hisselerimizi cemî‘ tevâbi‘ ve levâhıkı ve kâffe-i hukūk ve merâfıkı ile tarafından icâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile on bir bin iki yüz akçeye bi’l-asâle bey‘ ve temlîk ol dahi ber-vech-i muharrer iştirâ ve temlîk ve teslîm ve kabz ve kabûl eyledikden sonra semeni olan meblağ-ı mezbûr on bir bin iki yüz elli akçeyi mezbûre Fâtıma Hatun yedinden tamâmen ahz u kabz eyledik ba‘de’l-yevm menzil-i mahdûd-ı mezkûrun nısfından tashîh-i merkūm üzere [31a] isâbet eden dokuzar sehm hisselerimiz mezbûre Fâtıma Hatun’un mülk-i müşterâsı ve hakk-ı sırfı olmuşdur keyfemâ-teşâ ve tahtâr mutasarrıfa olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîre ma‘an mürsel es-Seyyid Mustafa b. Sefer ve Mustafa b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sâlis min-Muharremi’l-harâm li-sene selâsîn ve mi’e ve elf. Şuhûdü’l-hâl: Ahmed Efendi b. Derviş Ahmed, Ali Çelebi b Mehmed, Mehmed Efendi b. Ahmed, Mehmed Çelebi b. Hasan, Osman Çelebi b. el-Hâc Mustafa müezzin, Mustafa Çelebi b. Mahmud, Abdullah Çelebi b. Mustafa ve gayruhüm.