Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 130 Hüküm no: 84 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram oğlu el-Hac Mehmed’in terekesinden vârislerinin hisselerini aldıkları Husûs-ı âti’l-beyânın mahallinde ketb ü tahrîr iltimâs olunmağın kıbel-i şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahallesinde sâkin iken bundan akdem vefât eden el-Hâc Mehmed b. Bayram’ın ile’l-vefât sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûr el-Hâc Mehmed b. Bayram’ın verâseti zevce-i menkûha-i metrûkesi Fâtıma Hatun bt. Hüseyin ile sulbiye sagīre kızı Hanife ve li-ebeveyn er karındaşı oğulları el-Hâc Ahmed ve Ali b. Hasan’a münhasıra ve tashîh-i mes’elesi kırk sekiz sehimden olup sihâm-ı mezbûrdan altı sehmi zevcesi mezbûre Fâtıma Hatun’a ve yirmi dört sehmi sagīre-i mezbûre kızı Hanife’ye ve bâkī on sekiz sehmin dokuzar sehmi mezbûrân el-Hâc Ahmed ve Ali’[den] her birine isâbeti tahkīkinden sonra mezbûrân el-Hâc Ahmed ve Ali meclis-i ma‘kūd-ı mezkûrda zâtı Mehmed Çelebi b. Hasan ve Osman Çelebi b. el-Hâc Mustafa ta‘rîfleriyle ile mu‘arrefe <>olup müteveffâ-yı mezbûr el-Hâc Mehmed’in zevcesi ve vasiyye-i muhtâresi olmağla tereke-i müteveffâ-yı mezbûra bi’l-verâse ve bi’l-vesâye vâzı‘atü’l-yed olan işbu bâ‘isetü’l-kitâb mezbûre Fâtıma Hatun mahzarında her biri bi’l-asâle ikrâr ve takrîr-i kelâm edip mûrisimiz müteveffâ-yı mezbûr el-Hâc Mehmed b. Bayram’ın terekesinden olmak üzere ba‘de’l-ihrâci’l-masârıf ber-mûceb-i defter-i kassâm-ı askerî tashîh-i merkūm üzere hisselerimize isâbet eden beş bin altı yüz yirmi beşer akçeyi mezbûre Fâtıma Hatun’da n tamâmen her birimiz ahz u kabz edip min-ba‘d defter-i kassâm-ı askerî hâric kalan gerek zimem-i nâs ve eşyâdan mâ‘adâ meblağ-ı mezbûrdan mezbûre Fâtıma Hatun yedinde ve zimmetinde bir akçe ve bir habbe bâkī kalmayıp her birimiz mezbûre Fâtıma Hatun’un zimmetini ibrâ ve ıskāt eylediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ma‘an mürsel es-Seyyid Mustafa b. Sefer ve Mustafa b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sâlis min-Muharremi’l-harâm sene 1136 Şuhûdü’l-hâl: Es-sâbıkūn