Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 135 Hüküm no: 89 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan oğlu Hüseyin Ağa ile zevcesi Derviş kızı Saime Hatun’un terekesinden vârislerin hisselerini aldıkları Medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Molla Mehmed Bey mahallesi ahâlîsinden olup bundan akdem tarîk-ı hacc-ı şerîfde vefât eden Hüseyin Ağa b. Hasan’ın verâseti zevce-i menkûha-i metrûkesi Saime Hatun bt. Derviş ile li-ebeveyn kız karındaşı olup vilâyet-i Anadolu’da Manisa kazâsında sâkine Âişe Hatun nâm gāibeye münhasıra olup kable’l-kısme zevce-i mezbûre Saime Hatun dahi vefât edip verâseti sadriye kebîre kızı Fâtıma Hatun bt. Ramazan ile usûbet-i nesebiyye cihetinden er karındaşı oğlu Mustafa Bey’e ve sagīr Yusuf ve İbrahim’e ve âhar li-ebeveyn er karındaşı oğlu Süleyman Bey’e münhasıra ve tashîh-i mes’elesinin a‘la tarîkı’l-münasahati’ş-şer‘iyye otuz iki sehimden olup sihâm-ı mezbûrenin yirmi dört sehmi gāibe-i mezbûre Âişe Hatun’a ve dört sehmi mezbûre Fâtıma Hatun ve birer sehmi mezbûrûn Mustafa Bey ve Yusuf ve İbrahim ve Süleyman Bey’den her birine isâbeti tahkīkinden sonra müteveffât-ı sâniye-i mezbûre Saime’nin sadriye kebîre kızı olup zâtı Ahmed Ağa b. Mustafa ve Nasuh Bey b. Mehmed ta‘rîfleriyle mu‘arrefe olan mezbûre Fâtıma Hatun meclis-i şer‘-i şerîf-i enverde müteveffâ-yı evvel-i mezbûr Hüseyin Ağa’nın li-ebeveyn kız karındaşı olup tereke-i müteveffâ-yı evvel-i mezbûr Hüseyin Ağa’nın li-ebeveyn kız karındaşı olup tereke-i müteveffâ-yı evvel mezbûre bi’l-verâse vâzı‘atü’l-yed olan gāibe-i mezbûre Âişe Hatun bt. Hasan b. Abdullah tarafından bâ-hüccet-i şer‘iyye vekîli el-Hâc Ömer b. Ali mahzarında ikrâr ve takrîr-i kelâm edip mûrisim müteveffâ-yı mezbûr Hüseyin Ağa’nın terekesinden tashîh-i mezbûr üzere hisseme isâbet eden üç yüz elli guruşu terekeden olmak üzere vekîl-i mezbûr el-Hâc Ömer bana def‘ ü teslîm ben dahi yedinden tamâmen alıp kabz ettim meblağ-ı mezbûr üç yüz guruşdan vekîl-i mezbûr el-Hâc Ömer Ağa yedinde ve zimmetinde bir akçe ve bir habbe bâkī kalmayıp min-ba‘d müteveffâ-yı mezbûr Hüseyin Ağa’nın terekesinden gerek eşyâ ve gerek emlâk ve bi’l-cümle ism-i mâl ıtlâk olunur tereke-i ma‘lûme ve mechûlesine müte‘allıka âmme-i de‘âvî ve mutâlekât [mutâlebât] ve eymân [ve] muhâsamâtdan müvekkile-i mezbûre Âişe Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim vekîl-i mezbûr el-Hâc Ömer Ağa dahi medfû‘u olan meblağ-ı mezbûr üç yüz elli guruş mutâlebesinden benim [33a] zimmetimi ibrâ-i âmm-ı kātı‘u’n-nizâ‘la ibrâ ve ıskāt edip ba‘de’l-yevm birbirimiz ile vechen mine’l-vücûh ve sebeben mine’l-esbâb kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’s-sâdis min-Muharremi’l-harâm li-sene selâsîn ve mi’e ve elf. Şuhûdü’l-hâl: İsmail Efendi b. el-Hâc Osman, Tatar Ahmed Ağa b. Abdurrahman, İbrahim Ağa b. Mehmed, Mustafa b. İsmail, Hüseyin Ağa b. Hasan, Mehmed Efendi b. Ahmed imâm-ı Evlice Baba.