Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 135 Hüküm no: 88 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin kızı Fâtıma Hatun’un ölen kocası Bayram oğlu el-Hâc Mehmed’e ait alacak davasından vazgeçtiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahallesinde sâkin iken bundan akdem vefât eden el-Hâc Mehmed b. Bayram’ın ile’l-vefât sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Hüseyin ile sulbiye sagīre kızı Hanife ve usûbet-i nesebiyye cihetinden ammi oğulları el-Hâc Ahmed ve Ali’ye münhasıra olduğu şer‘an zâhir oldukdan sonra müteveffâ-yı mezbûrun zevce-i menkûha-i metrûkesi olup zâtı Ali Çelebi b. Mehmed ve Mustafa b. Mahmud ta‘rîfleriyle mu‘arrefe olan mezbûre Fâtıma Hatun meclis-i ma‘kūd-ı mezbûrda müteveffâ-yı mezbûrun ammi oğlu olup tereke-i müteveffâ-yı mezbûra bi’l-verâse vâzı‘u’l-yed olan işbu bâ‘isü’l-kitâb mezbûr el-Hâc Ahmed mahzarında ikrâr ve takrîr-i kelâm edip zevcim el-Hâc Mehmed zimmetinde bâ-hüccet-i şer‘iyye karz-ı şer‘îden beş yüz guruş hakkım olup meblağ-ı mezbûru mezbûr el-Hâc Ahmed’den taleb ve da‘vâ eylediğimde ol dahi bi’l-külliye inkâr etmişidi el-hâletü hâzihi da‘vâ-yı mezkûruma beyyinem olmamağla müdde‘âm olan meblağ-ı mezbûr da‘vâsından fâriğ olup meblağ-ı mezbûr beş yüz guruş mutâlebesinden mezbûr el-Hâc Ahmed’in ve Ali’nin ve sagīre-i mezbûre Hanife’nin ve mezbûr Ali Çelebi’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mezbûrûn ile vechen mine’l-vücûh ve sebeben mine’l-esbâb aslâ ve kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ma‘an mürsel es-Seyyid Mustafa b. Sefer ve Ali Çelebi b. Abdulbâki ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fî-gurreti Muharremi’l-harâm li-sene selâsîn ve mi’e ve elf. Şuhûdü’l-hâl: Ahmed Efendi b. Derviş Ahmed, Ali Çelebi b. Mehmed, Mehmed Çelebi b. Ahmed, Mehmed Çelebi b. Hasan ve gayruhüm.