Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 137 Hüküm no: 91 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zülfikar oğlu Ali Ağa’nın oğluna nafaka takdiri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Ali Ağa b. Zülfikar’ın sulbî sagīr oğlu Mustafa’nın tesviye-i umûruna kıbel-i şer‘den mansûb vasîsi olan işbu râfi‘u’l-kitâb Hamâmî Mustafa Ağa b. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîsi olduğum sagīr-i mezbûrun nafaka ve kisve bahâya eşedd-i ihtiyâcı olmağla babası müteveffâ-yı mezbûrdan müntakil mâlından kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyy-i mezbûr Mustafa Ağa’nın kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun babası müteveffâ-yı mezbûrdan müntakil mâlından yevmî on üç akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīr-i mezbûr Mustafa’nın nafaka ve kisve bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasiyy-i mezbûr Hamâmî Mustafa Ağa’ya izin birle mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: el-Hâc Mehmed Ağa b. el-Hâc Zülfikar, el-Hâc İbrahim Efendi b. Mehmed Efendi İmâm, Yusuf Çelebi b. Abdullah, Veliyüddin b. Ali, es-Seyyid Mustafa b. Sefer, Mehmed Çelebi b. Ali, Mehmed Çelebi b. Tâbi Yusuf Ağa, es-Seyyid Yahya Çelebi b. el-Hâc İbrahim Efendi, es-Seyyid Süleyman Çelebi b. es-Seyyid Mehmed ve gayruhüm.