Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 138 Hüküm no: 92 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgo oğlu Yenaki’nin menzilinin Abdülkadir oğlu Minderci Mehmed Beşe tarafından hayatta iken takas edilerek alındığı Havâss-ı Refî‘a kazâsı muzâfâtından Terkos nâhiyesine tâbi‘ Sivas nâm karyede sâkin iken bundan akdem vefât eden Minderci Mehmed Beşe b. Abdülkadir b. Abdülkerim’in li-eb er karındaşı ve hasran vârisi olan Ahmed Beşe b. Abdülkadir b. Abdülkerim tarafından husûsü’l-beyânı vekîl olduğu Ahmed Çelebi b. İbrahim ve Mustafa Beşe b. Ali nâm kimesneler şehâdetleriyle şer‘an sâbit ve sübût-ı vekâletine hükm-i şer‘î ve lâhık olan es-Seyyid Mustafa b. Ahmed meclis-i şer‘-i enverde nâhiye-i mezbûreye tâbi‘ Arnavud nâm karye sükkânından Yenaki v. Yorgo muvâcehesinde bi’l-vekâle üzerine da‘vâ ve takrîr-i kelâm edip müvekkilim mezbûr Ahmed Beşe’nin karındaşı müteveffâ-yı mezbûr Minderci Mehmed Beşe’nin mesfûr Yenaki zimmetinde işbu bin yüz yirmi iki senesi Cumâdelâhire’nin yirmi üçüncü günü târîh ile müverrah deyn temessükü mûcebince cihet-i karz-ı şer‘îden yüz guruş hakkı olup meblağ-ı mezbûru müteveffâ-yı mezbûr Minderci Mehmed Beşe kable’l-ahz fevt olmağla mesfûr Yenaki’den bi’l-vekâle taleb ederim suâl olunup alıverilmesi matlûbumdur dedikde gıbbe’s-suâl mezbûr Yenaki cevâbında fi’l-hakīka müteveffâ-yı mezbûr Minderci Mehmed Beşe’ye ber-vech-i muharrer yüz guruş deynim olup lâkin sâlifü’z-zikr Arnavud karyesinde vâki‘ bir tarafdan Toled? zimmî mülkü ve bir tarafdan Tarandafil zimmî mülkü ve bir tarafdan Vend zimmî mülkü ve bir tarafdan tarîk-ı âm ile mahdûd büyût-ı adîde muhtevî mülk menzili müteveffâ-yı mezbûrun hayâtında fevtinden üç sene mukaddem yüz guruşa bey‘ ve teslîm ve semen-i mebî‘ deynim olan meblağ-ı mezbûr mukābelesinde takās ve mahsûb eylediğimde ol dahi mukâsa [33b] ve kabûl ve kabz edip ol vechile müteveffâ-yı mezbûr deynim olan meblağ-ı mezbûr yüz guruş zimmetim berî olmuşdur deyu def‘le mukābele edicek gıbbe’s-suâl ve gıbbe’l-istintâk ve’l-inkâr mesfûr Yenaki’den def‘-i meşrûha mutâbıka beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Keçeci Pîrî mahallesinde sâkin Mehmed Çelebi b. Hüseyin ve Yusuf Beşe b. Abdullah ve el-Hâc Muhyiddin mahallesinde sâkin Ömer Efendi b. Mahmud ve İsmail Beşe b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mesfûr Yenaki müteveffâ-yı mezbûr Minderci Mehmed Beşe b. Abdülkadir b. Abdülkerim’e bâ-temessük cihet-i karz-ı şer‘îden yüz guruş deyni olup Arnavud karyede vâki‘ sâlifü’z-zikr ma‘lûmü’l-hudûd ve’l-müştemilât mülk menzilini müteveffâ-yı mezbûr Minderci Mehmed Beşe’ye hayâtında fevtinden üç sene mukaddem bizim huzûrumuzda yüz guruşa bey‘ ve teslîm ve semen-i deyn olan meblağ-ı mezbûr yüz guruşu mukābelesinde takās eyledi bu vecih üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’t-tâsi‘ min-Saferi’l-hayr sene 1130. Şuhûdü’l-hâl: El-Hâc Süleyman Ağa b. Ahmed, Ahmed Ağa b. Mahmud, Mustafa Efendi b. Hüseyin, Hasan b. Mehmed, Hüseyin Efendi b. Abdürrezzak, Ebubekir Efendi b. İbrahim, Hüseyin Beşe b. Mehmed, Hasib Beşe b. Abdullah, es-Seyyid Mustafa b. Sefer.