Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 400 Hüküm no: 467 Orijinal metin no: [63b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Solak Ahmed Beşe b. Haydar’ın çocuklarına intikal eden börekçi dükkânının kiraya verildiği Mahmiye-i İstanbul’da Sarı Nasuh mahallesi sâkinlerinden iken fevt olan Solak Ahmed Beşe b. Haydar’ın sulbî oğulları Mustafa ve Abdurrahman nâm sagīrlerin vasiyy-i muhtârları olan fahrü’l-akrân Abdullah Çelebi b. Osman nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda börekçi tâifesinden işbu bâ‘isü’l-kitâb el-Hâc Mustafa b. Hüseyin nâm kimesne mahzarında ikrâr ve takrîr-i kelâm edip merhûm Pîrî Paşa vakfı’ndan olup icâreteyn-i ma‘hûdeteyn ile sagīrân-ı mezbûrânın tasarruflarında olup mahmiye-i mezbûrede Küçük Karaman’da vâki‘ beyne’l-ahâlî ve’l-cîrân ma‘lûmü’l-hudûd börekçi dükkânını vesâyetim hasebiyle târih-i kitâb şehri gurresinden bir sene tamâmına değin her bir ay tamâmında bana yedişer yüz ellişer akçe teslîm etmek üzre nakid râyic fi’l-vakt dokuz bin akçeye mezbûr el-Hâc Mustafa’ya îcâr ve teslîm edip ol dahi vech-i muharrer üzre istîcâr ve kabûl ve tesellüm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Hacı Mustafa b. Hüseyin, el-Hâc Mehmed b. Müstecab, Mustafa Çelebi b. ( ), Mehmed Çelebi b. Mustafa, Veli b. Hasan, Receb b. Mahmud.