Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 399 Hüküm no: 466 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. el-Hâc Nimet’in, evini Mustafa Ağa b. Mehmed’e sattığı Husûs-ı âti’l-beyânın mahallinde tahrîri iltimâs olunmağın kıbel-i şer‘den mevlânâ keşfî Mustafa Efendi irsâl olunup ol dahi mahmiye-i İstanbul’da Zeyrek mahallesinde mefharü’l-eşbâh Hasan Ağa b. el-Hâc Nimet’in sâkin olduğu menzile varıp zeyl-i rakīmde isimleri muharrer olan müslimîn huzûrunda akd-i meclis-i şer‘ eyledikde vilâyet-i Anadolu’da medîne-i Tire’de Murtaza Ağa mahallesi sükkânından Mustafa Ağa b. Mehmed meclis-i ma‘kūd-ı mezbûrda işbu bâ‘isü’l-kitâb Hacı Ahmed Ağa b. Mehmed mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup zikr olunan Murtaza Ağa mahallesinde vâki‘ iki tarafı Ahmed Çavuş mülküne ve bir tarafı Hacı Mehmed Ağa mülküne ve bir tarafı tarîk-i âma müntehî hâriciyyede iki bâb fevkānî ve iki bâb tahtânî odaları ve bir ahır ve mâ-i cârî ve zât-ı eşcâr-ı müsmire ve gayr-ı müsmire[li] bahçe ve kenîfi ve dâhiliyyede iki bâb tahtânî odaları ve zât-ı eşcâr-ı müsmire ve gayr-ı müsmire hadîkayı ve mâ-i cârî ve kenîfi müştemil mülk menzilimi cemî‘ tevâbi‘iyle bin iki yüz esedî guruşa müşârün-ileyh Ahmed Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan meblağ-ı mezbûr bin iki yüz esedî guruşu mûmâ-ileyh Ahmed Ağa yedinden tamâmen ahz u kabz edip menzil-i merkūmu mahallinde kabza mezbûr Ahmed Ağa’yı taslît eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hüseyin ile meclis-i şer‘a gelip vukū‘u üzre inhâ ve takrîr etmeğin mâ vaka‘a bi’t-taleb ketb olundu. Fi’l-âşir min Recebi’l-mürecceb li sene seb‘a ve seb‘în ve elf. Şuhûdü’l-hâl: Sâlih Efendi b. Ömer el-Müderris, Mehmed Efendi b. Emir el-Müderris, Mehmed Çavuş b. Yusuf, es-Seyyid Ali Çelebi b. es-Seyyid Mustafa, es-Seyyid Mehmed Çelebi b. es-Seyyid Ali, Mehmed Çelebi b. Bayezid, Mustafa Efendi b. Kemal.