Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 147 Hüküm no: 102 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed kızı Emine Hatun’un çocuklarının vasisi üzerine hasbî nâzır tayini Medîne-i hazret-i Ebâ Eyyüb el-Ensârî -radıye anhu Rabbihü’l-Bârî- mahallâtından Evlice Baba mahallesinde sâkine iken bundan akdem vefât eden Emine Hatun bt. Mehmed’in sadrî sagīr oğulları İbrahim ve Ahmed’in tesviye-i emirlerinde kıbel-i şer‘den mansûb vasîleri olan Mehmed Çelebi b. İbrahim nâm kimesnenin üzerine bir hasbî nâzır lâzım ve mühim olmağın emânet ile ma‘rûf ve diyânet ile mevsûf her vechile nezâret uhdesinden gelmeğe kādir idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīrân-ı mezbûrânın cedleri işbu râfi‘u’l-kitâb Mehmed Çelebi b. Mustafa nâm kimesneyi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri vasiyy-i mezbûr Mehmed Çelebi üzerine hasbî nâzır nasb ve ta‘yîn buyurduklarında ol dahi nezâret-i merkūmeyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’r-râbi‘ ve ışrîn min-Rebî‘i’l-evvel li-sene selâsîn ve mi’e ve elf. Şuhûdü’l-hâl: Abdullah Çelebi b. Ömer, Hüseyin Çelebi b. Abdullah, Mehmed Efendi imâm, Osman Çelebi b. el-müezzin, Salih Çelebi b. Mehmed, es-Seyyid Mustafa b. Sefer, Ali Çelebi b. Abdulbâki, el-Hâc Mustafa kebâbî, Hasan Çelebi kebâbî, Mustafa Çelebi b. el-Hâc İbrahim ve gayruhüm [mine’l-] hazırîn.