Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 147 Hüküm no: 103 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed kızı Emine Hatun’un çocukları üzerine vasi tayini Medîne-i hazret-i Ebâ Eyyüb el-Ensârî -radıye anhu Rabbihi’l-Bârî- mahallâtından Evlice Baba mahallesinde sâkine iken bundan akdem vefât eden Emine Hatun bt. Mehmed’in sadrî sagīr oğulları İbrahim ve Ahmed’in tesviye-i emrlerinde kıbel-i şer‘den vasî nasbı lâzım ve mühim olmağın emânet ile ma‘rûf ve diyânet ile mevsûf her vechle vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīrân-ı mezbûrânın babaları işbu râfi‘u’l-kitâb Mehmed Ağa b. el-Hâc İbrahim hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın İbrahim ve Ahmed’in vakt-i rüşd-i sedâdına değin vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’r-râbi‘ ve ışrîn min-Rebî‘i’l-evvel li-sene selâsîn ve mi’e ve elf. Şuhûdü’l-hâl: Es-sâbıkūn.