Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 153 Hüküm no: 109 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa oğlu Mehmed Bey’in bazı eşyalarını hayatta iken kardeşi Ebubekir’e hibe ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden Mustafa Efendi b. Hüseyin irsâl olunup ol dahi Havâss-ı Refî‘a kazâsı muzâfâtından Çekmece-i Kebîrî nâhiyesine tâbi‘ Bosna nâm karyede sâkin iken bundan akdem vefât eden Mehmed Bey b. Mustafa b. Resul [ile’]l-vefât sâkin olduğu menzile varıp zeyl-i vesîkada muharrerü[‘l]-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrun sulbî sagīr oğlu Ahmed’in üvegi vâlidesi ve tesviye-i umûruna bâ-hüccet-i şer‘iyye vasiyy-i muhtârı olup zâtı ta‘rîfe olan Hadice Hatun bt. Abdullah meclis-i ma‘kūd-ı mezkûrda müteveffâ-yı mezbûrun li-ebeveyn karındaşı Ebubekir mahzarında bi’l-vesâye üzerine da‘vâ ve takrîr-i kelâm edip mezbûr Ebubekir vasiyyesi olduğum sagīr-i mezbûrun babası müteveffâ-yı mezbûr Mehmed Bey b. Mustafa b. Resul’ün [38b] terekesinden olmak üzere yirmi keyl hınta ve iki re’s kara sığır öküzü ve bir re’s kara sığır ineği ma‘a dana ve yirmi keyl alef ve on keyl şa‘îr ve altı çit samanı mezbûr Ebubekir bi-gayrı hakkın vaz‘-ı yed edip suâl olunup kasr-ı yedine tenbîh olunmak bi’l-vesâye matlûbumdur dedikde gıbbe’s-suâl mezbûr Ebubekir cevâbında fi’l-hakīka müteveffâ-yı mezbûrun terekesinden olmak üzere vaz‘-ı yedini ikrâr lâkin karındaşım müteveffâ-yı mezbûr Mehmed Bey hâl-i hayâtında ve kemâl-i akl-ı sıhhatinde târîh-i kitâbdan sekiz ay mukaddem huzûr-ı Müslimînde bana ol vechile mülk-i mevrûsum olmak üzere hibe ve teslîm ben dahi meclis-i hibede ittihâb ve kabûl ve kabz eyledim deyu def‘le mukābele edicek gıbbe’l-istintâk ve’l-inkâr mezbûr Ebubekir’den def‘-i meşrûhuna mutâbık beyyine taleb olundukda udûl-i ahrâr-ı ricâl-i Müslimînden karye-i mezbûre sâkinlerinden Mustafa Beşe b. Abdullah ve diğer Mustafa b. İslâm nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr Mehmed Bey b. Mustafa b. Resul kendi terekesinden olmak üzere yirmi keyl hınta ve iki re’s kara sığır öküzü ve bir re’s kara sığır ineği ma‘a dana ve yirmi keyl alef ve on keyl şa‘îr ve altı çit samanı hâl-i hayâtında ve kemâl-i akl-ı sıhhatinde târîh-i kitâbdan sekiz ay mukaddem işbu mezbûr Ebubekir’e hibe ve teslîm ol dahi meclis-i hibede intihâb ve kabûl ve kabz eyledi biz bu husûsa bu vech üzere şâhideleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle vasiyye-i mezbûre Hadice Hatun’u mu‘âraz[a]dan men‘ olunduğunu mevlânâ-yı mezbûr mahallinde ketb ü tahrîr ba‘dehû ma‘an irsâl olan Çukadâr Ali Çelebi b. Abdülkadir ve es-Seyyid Mustafa b. Sefer meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’[l-yevmi’]s-sânî min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: Ali Çelebi b. Şa‘ban, Mustafa Efendi b. Abdullah, Ca‘fer Ağa b. Abdullah, Selman Ağa b. Hasan, Mustafa Bey b. Abdullah.