Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 154 Hüküm no: 110 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu Mehmed Ağa’nın terekesinden menzil ve çiftliği hayatta iken zevcesi Mehmed kızı Ayşe Hatun’a hibe ettiği Havâss-ı Refî‘a kazâsı muzâfâtından Terkos nâhiyesine tâbi‘ Yassıviran nâm karyede sâkin iken bundan akdem vefât eden sâbıkā Avcıbaşı Mehmed Ağa b. Abdullah’ın verâseti zevce-i menkûha-i metrûkesi Âişe Hatun bt. Mehmed ile sulbiye sagīre kızları Fâtıma ve Ümmühan’a münhasıra ve tashîh-i mes’ele on altı sehimden olup sihâm-ı mezbûrenin iki sehmi zevcesi mezbûre Âişe Hatun’a ve yedişer sehmi kızları mezbûretân Fâtıma ve Ümmühan’a isâbeti tahakkukundan sonra mezbûre Fâtıma tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân Ali Beşe b. Mehmed ve Mehmed Beşe b. Salih şehâdetleriyle şer‘an sâbit ve sübût-ı vekâletine hükm-i şer‘î lâhık olan zevci Mustafa Beşe b. Veli meclis-i şer‘-i şerîf-i enverde müteveffâ-yı mezbûr[un] tereke[sine] bi’l-verâse vâzı‘u’l-yed olup zâtı ta‘rîf-i şer‘î ile mu‘arrefe olan işbu bâ‘isü’l-kitâb mezbûre Âişe Hatun mahzarında bi’l-vekâle üzerine da‘vâ ve takrîr-i kelâm edip zevcem müvekkile-i mezbûre Fâtıma’nın babası müteveffâ-yı mezbûr Avcıbaşı Mehmed Ağa b. Abdullah’ın terekesinden olup karye-i mezbûrda vâki‘ ma‘lûmü’l-hudûd [ve’]l-müştemilât bir kıt‘a mülk menzil ve yine karye-i mezbûrda vâki‘ kezâlik ma‘lûmü’l-hudûd bir kıt‘a mülk çiftlik ve içinde mevcûd üç yüz keyl hınta ve üç yüz keyl alef ve iki yüz keyl şa‘îr ve dört çift kara sığır öküzü ve bir çift camus öküzü ve üç re’s kara sığır ineği ve bir re’s camus ineği ve beş re’s kısrağı mezbûre Âişe Hatun ketm ve ihfâ ve terekeye idhâlden imtinâ‘ etmekle zikrolunan menzil ve çiftlik ve sâir hubûbâtdan müvekkile-i mezbûrenin tashîh-i mezbûr üzere hisse-i irsiyyesini ve hınta ve şa‘îr ve alef bi’l-vekâle taleb ederim suâl olunup alıverilmesi matlûbumdur dedikde gıbbe’s-suâl mezbûre Âişe Hatun cevâbında fi’l-hakīka zikrolunan terekeye vaz‘-ı yedini ikrâr lâkin zevcim müteveffâ-yı mezbûr Avcıbaşı Mehmed Ağa b. Abdullah b. Abdullah hâl-i hayâtında ve kemâl-i akl-ı sıhhatinde fevtinden altı ay mukaddem mârrü’z-zikr menzil ve çiftlik ve menzili ve içinde mevcûd hınta ve alef ve şa‘îr ve sâir hubûbâtı huzûr-ı Müslimînde bana hibe ve teslîm ben dahi meclis-i hibede ittihâb kabz ve kabûl edip ol vechile [39a] benim mülk-i mevhûbum olmuşdur deyu def‘le mukābele edicek gıbbe’l-istintâk ve’l-inkâr mezbûre Âişe Hatun’da n def‘-i meşrûhuna [beyyine] taleb olundukda udûl-i ahrâr-ı ricâl-i Müslimînden karye-i mezbûre sükkânından Ahmed Beşe b. Mehmed ve Mehmed Beşe b. Murtaza ve Mustafa Beşe b. Hüseyin ve Süleyman b. Abdurrahman li-ecli’ş-şehâde meclis-i şer‘[a] hâzırân olup isre’l-istişhâd fi’l-hakīka müteveffâ-yı mezbûr Evcibaşı Mehmed Ağa b. Abdullah b. [Abd]ullah hâl-i hayâtında ve kemâl-i akl-ı sıhhatinde fevtinden altı ay mukaddem yedinde mülk ve hakkı olup karye-i mezbûrda vâki‘ bir kıt‘a mülk menzili ile mârrü’z-zikr çiftlik ve içinde mevcûd üç yüz keyl hınta ve üç yüz keyl alef ve iki yüz keyl şa‘îr ve dört çift kara sığır öküzü ve bir çift camus öküzü ve üç re’s kara sığır ineği ve bir re’s camus ineği ve beş re’s kısrağını zevcesi işbu müdde‘iye-i mezbûre Âişe Hatun’a bizim huzûrumuzda hibe ve teslîm ol dahi meclis-i hibede ittihâb ve kabz ve kabûl edip ol vechile mezbûre Âişe Hatun’un mülk-i mevrûsu olmuşdur < > biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketbolundu. Fî 11 Rebî‘ülâhir li-sene selâsîn ve mi’e ve elf. Şuhûdü’l-hâl: El-Hâc Mehmed b. Hüseyin, Abdüllatif Efendi b. Ali, Veli Efendi b. Ali, Mustafa Çelebi b. Abdulbâki, Mehmed Çelebi b. Ahmed, İsmail Çelebi b. Mehmed, Mehmed b. Musa, Ali b. Ömer, Mehmed b. Abdullah.