Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 401 Hüküm no: 469 Orijinal metin no: [63b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ümmühani bt. Ömer’in ev hissesinin Yusuf Çelebi’ye satıldığı Mahmiye-i İstanbul’da Nişancı Paşa mahallesinde sâkine iken bundan akdem vefât eden Ümmühâni bt. Ömer nâm sagīrenin verâseti zevc-i âhardan hâmil vâlidesi Mülâyim bt. Abdullah’a ve li ebeveyn ammi oğlu Receb Beşe nâm kimesneye münhasıra ve mezbûre Mülâyim iddi‘â-i haml etmekle tashîh-i mes’eleleri altı sehimden olup sihâm-ı mezbûrenin iki sehmi mezbûre Mülâyim’e ve bir sehmi hamli için mevkūf kılınıp ve üç sehmi mezbûr Receb Beşe’ye isâbet eylediği şer‘an zâhir ve mütehakkik oldukdan sonra [64a] merkūme Mülâyim tarafından husûs-ı âti’l-beyâna vekîl olduğu mezbûrenin verâsetini ma‘rifet-i şer‘iyye ile ârifân olan zevci Ramazan Beşe b. Cafer ve Mustafa b. Abdi nâm kimesneler şehâdetleri ile şer‘an sâbit olan Mehmed Efendi b. el-Hâc Ahmed nâm kimesne meclis-i şer‘de işbu bâ‘isü’l-kitâb Yusuf Çelebi b. ( ) nâm kimesne mahzarında bi’l-vekâle ikrâr ve takrîr-i kelâm edip mahalle-i mezkûrede vâki‘ bir tarafdan Sarı Solak Mehmed Çelebi veresesi mülkleri ve bir tarafdan Musa Efendi b. Ali mülkü ve bir tarafdan Âlime Hâtun mülkü ve bir tarafdan tarîk-i âm ile mahdûd menzilin nısfı merkūm Yusuf Çelebi’nin zevcesi Âişe bt. Hacı Ali’nin mülkü ve nısfı müteveffât-ı mezbûre Ümmühâni’nin terekesinden olmağla vech-i muharrer üzre menzil-i mezbûrun nısfından müvekkile-i mezbûrenin iki sehim hissesini merkūm Yusuf Çelebi’ye tarafeynden îcâb ve kabûlü hâvî bey‘-i bât ile yetmiş bir buçuk esedî guruşa bi’l-vekâle bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr yetmiş bir buçuk esedî guruşu merkūm Yusuf Çelebi yedinden bi’l-vekâle tamâmen ahz u kabz eyledim ba‘de’l-yevm müvekkilem mezbûrenin vech-i muharrer üzre menzil-i mezbûrda olan iki sehim hissesi merkūm Yusuf Çelebi’nin mülk-i müşterâsıdır keyfe mâ yeşâ’ ve yahtâr tasarruf eylesin dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mefharü’l-kuzât es-Seyyid Ahmed Efendi b. es-Seyyid Mehmed Efendi, Ahmed Efendi b. Şeyh Mehmed el-İmâm, Mustafa Ağa b. Ömer, Yusuf Çelebi b. ( ) el-Müezzin, Ahmed Ağa b. Mehmed, Hacı İbrahim b. Abdünnebi, Hüseyin Çelebi b. İsmail, Şaban b. Mustafa.