Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 402 Hüküm no: 470 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ümmühani bt. Ömer’den kalan terekenin vasîden alınıp vârislere paylaştırıldığı Mahmiye-i İstanbul’da Nişancı Paşa mahallesinde sâkine iken bundan akdem vefât eden Ümmühâni bt. Ömer nâm sagīrenin verâseti zevc-i âhardan hâmil vâlidesi Mülâyim bt. Abdullah ile li ebeveyn ammi oğlu Receb Beşe nâm kimesneye münhasıra ve mezbûre Mülâyim iddi‘â-i haml etmekle tashîh-i mes’eleleri altı sehimden olup sihâm-ı mezbûrenin iki sehmi mezbûre Mülâyim’e ve bir sehmi haml için mevkūf kılınıp ve üç sehmi mezbûr Receb Beşe’ye isâbet eylediği şer‘an zâhir ve mütehakkik oldukdan sonra merkūme Mülâyim tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân zevci Ramazan Beşe b. Cafer ve Mustafa b. Abdi nâm kimesneler şehâdetleri ile şer‘an sâbit olan Mehmed Efendi b. Hacı Ahmed nâm kimesne meclis-i şer‘-i hatîr-i lâzımü’t-tevkīrde sagīre-i mezbûrenin vasîsi ve terekesine vâzı‘ü’l-yed olan bâ‘isü’l-kitâb Yusuf Çelebi nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûrenin kızı müteveffât-ı mezbûre Ümmühâni’nin defter-i kassâm mûcebince babasından intikāl edip vasiyy-i mezbûrun yedinde olan muhallefâtı yirmi dört bin sekiz yüz kırk akçe olup meblağ-ı mezbûrun bin yedi yüz otuz iki akçesini veresesi rızâları ile sagīre-i mezbûrenin techîz ve tekfînine harç ve sarf edip bâkī yedinde yirmi üç bin yüz altı akçe kalmışidi müvekkilem mezbûrenin meblağ-ı bâkī-i mezbûrdan iki sehim hissesine isâbet eden yedi bin yedi yüz iki akçenin dört bin dört yüz iki akçesini merkūm Yusuf Çelebi yedinden nakid alıp kabz edip ve üç bin üç yüz akçesi muhallefât-ı mezbûrdan olup vasiyy-i merkūm Yusuf Çelebi yedinde olan üç yüz akçe kıymetli bir beledî döşek ve iki yüz akçe kıymetli bir köhne kırmızı kumaş yorgan ve iki yüz elli akçe kıymetli bir yemeni yorgan ve iki yüz elli akçe kıymetli bir sereng yorgan ve yüz yirmi akçe kıymetli bir mâî kebe ve iki yüz akçe kıymetli bir kadife yastık ve yüz elli akçe kıymetli sereng yorgan ve yüz yirmi akçe kıymetli bir kırmızı velense ve dört yüz elli akçe kıymetli üç minder ve dört yüz akçe kıymetli bir kaliçe ve seksen akçe kıymetli bir kilim ve yüz elli akçe kıymetli üç yastık ve yüz elli akçe kıymetli bir yan keçesi ve yüz otuz akçe kıymetli bir hamam leğeni ve seksen akçe kıymetli bir tencere ve yüz akçe kıymetli bir güğüm ve kırk akçe kıymetli bir ibrik ve seksen akçe kıymetli bir satıl ve yüz seksen akçe kıymetli bir leğen ve bir ibrik ve elli akçe kıymetli bir tava ve elli akçe kıymetli bir sahan alıp kabz eyledim, min ba‘d müvekkilem mezbûre Mülâyim’in mûrisesi sagīre-i müteveffât-ı merkūme Ümmühâni’nin terekesinden vasiyy-i merkūm yedinde bir akçe ve bir habbe hakkı kalmamışdır dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Es-Sâbikūn.