Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 166 Hüküm no: 119 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed kızı Havva Hatun’un vârislerinin İsmail Ağa’ya açtıkları miras davasından vazgeçtikleri Hu[sû]s-ı âti’l-beyânın mahallinde ketb ü tahrîri iltimâs olunmağın bu fakîr Havâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Kalikaritya nâm karyede vâki‘ İsmail Ağa b. İbrahim’in sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde karye-i mezbûrede sâkin iken bundan akdem vefât eden Havva Hatun bt. Mehmed’in sulbî kebîr oğlu İbrahim Beşe b. Mehmed ve oğlu Hüseyin Beşe b. mezbûr İbrahim Beşe ma‘kû[d]-ı mezkûrda işbu râfi‘u’l-kitâb mezbûr İsmail Ağa mahzarında her biri ikrâr ve takrîr-i kelâm edip vâlidem müteveffât-ı mezbûr Havva Hatun’un terekesinden olmak üzere bir o[r]ta keçesi ve bir sedefli akçe tahtası mezbûr İsmail Ağa ketm ve ihfâ eyledi deyu da‘vâ etmiş idik el-hâletü hâzihi târîh-i kitaba gelince gerek müteveffât-ı mezbûrenin terekesi ve gerek sâir beynimizde olan da‘vâdan mezbûr İsmail Ağa’nın zimmetini ibrâ ve ıskāt eyledik ba‘de’l-yevm mezbûr İsmail Ağa’dan bir şey da‘vâ edersek lede’l-hü[kkâ]mi’l-kirâm mesmû‘a olmasın dediklerinde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sânî min-Rebî‘i’l-âhir li-sene selâsîn ve mi’e ve elf. Şuhûdü’l-hâl: Mustafa Efendi b. Abdullah, Mustafa Ağa b. İsmail, İbrahim Ağa Mumcu, es-Seyyid Mustafa b. Sefer, Ali Çelebi b. Mustafa, İbrahim Ağa b. Mehmed, Hüseyin Ağa b. Mehmed, Hasan Ağa b. Abdullah, Mehmed Ağa b. İbrahim.