Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 169 Hüküm no: 122 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa kızı Ümmü Gülsüm Hatun’un kızı Ayşe’ye nafaka takdiri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Nazperver mahallesinde sâkine iken bundan akdem vefât eden Ümmü Gülsüm Hatun bt. Mustafa’nın sadriye sagīre kızı Âişe’nin min-kıbeli’l-ümmi ceddesi Hadice Hatun bt. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edip bi-hakkı’l-hıdâne hacr ve terbiyemde olan kızım müteveffât-ı mezbûrenin kızı sagīre-i mezbûre Âişe’nin nafaka ve kisve bahâya eşedd-i ihtiyâcı olmağla vâlidesi müteveffât-ı mezbûrenin mâl-ı müntakilesinden kadr-i ma‘rûf nafaka ve kisve bahâ farz ve takdîr olunmak matlûbumdur dedikde zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin vâlidesi müteveffât-ı mezbûreden müntakil mâlından kadr-i ma‘rûf beher yevm üçer akçe nafaka ve kisve bahz farz ve takdîr buyurup meblağ-ı mefrûz-ı mezbûr sagīre-i mezbûrenin nafaka ve kisve bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a mezbûre Hadice Hatun’a izin verildikden sonra sagīre-i mezbûrenin babası Ali Bey b. Hacı meclis-i mezkûrda mezbûre Hadice Hatun mahzarında ikrâr eder ki kızım sagīre-i mezbûrenin farz ve takdîr olunan meblağ-ı mezbûr üç akçe kifâyet etmemekle ben dahi kendi mâlımdan beher yevm dörder akçe nafaka ve kisvesi için vermeğe ta‘ahhüd eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’l-hâmis ve’l-ışrîn min-Rebî‘ülâhire sene 1130. Şuhûdü’l-hâl: Ahmed Efendi b. İmâm, Mehmed Efendi b. Ali, Mustafa Ağa b. Attâr, es-Seyyid Mustafa b. Sefer, Mustafa Efendi b. Hüseyin.