Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 170 Hüküm no: 123 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim oğlu Hüseyin Ağa’nın vârislerine vasi ve kayyım tayini Havâss-ı aliyye kazâsı muzâfâtından Çatalca kasabasında sâkin iken bundan akdem vefât eden Hüseyin Ağa b. İbrahim’in zevce-i menkûha-i metrûkesi Şerife Hadice Hatun’un batnında müstebîn hamla ile ve vilâyet-i Rumeli’nde Sarıgöl kazâsında vâlidesi Emine Hatun’un hisse-i mevkūfelerin ahz u kabz [ve] zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan mezbûre Şerife Hadice Hatun’un babası işbu râfi‘u’l-kitâb es-Seyyid Abdulbâki Çelebi b. es-Seyyid Mustafa’yı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi haml-i mezbûr ile vâlidesi gāib-i mezbûre Emine Hatun’un hisse-i mevkūfelerini ahz u kabz [ve] zabt u hıfza vasî ve kayyım nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘[ahh]üd ve iltizâm etmeğin mâ-vaka‘a bi’t-taleb ketbolundu. Fi’l-yevmi’l-hâdî ve’l-ışrîn min-Cemâziyelevvel li-sene selâsîn ve mi’e ve elf. Şuhûdü’l-hâl: Ahmed Ağa b. Mustafa, Abdullah Efendi b. Ali, Mehmed Ağa b. Hasan, Hüseyin b. Ahmed, Abdullah Çelebi b. Hasan, Mustafa Efendi b. Salih, Süleyman Efendi b. Ömer, Mustafa Çelebi b. Osman, es-Seyyid Mustafa b. Sefer, es-Seyyid Süleyman Çelebi b. es-Seyyid Mehmed, Mehmed Çelebi b. Süleyman ve gayruhüm.