Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 171 Hüküm no: 125 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa kızı Ayşe Hatun’un oğluna vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-’de Otakçıbaşı mahallesinde sâkine iken bundan akdem vefât eden Âişe Hatun bt. Mustafa’nın sadrî sagīr oğlu Mustafa’nın tesviye-i umûruna kıbel-i şer‘den bir vasî nasbı lâzım ve mühim olmağın emânet ile mu‘arrefe ve diyânet ile mevsûfe her vechle vesâyet uhdesinden gelmeğe kādir idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrun üvey vâlidesi işbu râfi‘atü’l-kitâb Fâtıma Hatun bt. Abdullah’ı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûr Mustafa’nın vakt-i rüşd-i sedâdına değin vasî nasb ve ta‘yîn buyurduklarından ol dahi vesâyet-i mezbûreyi kabûl ve hizmet-i lâzimesin kemâ-yenbağî edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sâbi‘ min-Cemâziyelâhir li-sene selâsîn ve mi’e ve elf. Şuhûdü’l-hâl: El-Hâc Mehmed Efendi b. İbrahim İmâm, Mustafa Çelebi b. Mehmed, İsmail Çelebi b. Derviş Ali, Mehmed Çelebi b. Halil, Taşçı el-Hâc İbrahim b. Maksud.