Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 170 Hüküm no: 124 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Himmet oğlu Mehmed Beşe’nin terekesinden vârislerin hisselerini aldıkları Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Evlice Baba mahallesinde [sâkin] iken bundan akdem vefât eden Fâtıma Hatun bt. Ahmed’in verâseti zevc-i metrûku Mehmed Beşe b. Himmet ile sadrî sagīr oğlu İsmail’e ve sadriye kebîre kızları Ümmühan’a ve diğer kızı olup sin ve cüssesinin bülûğa tahammülü olan Hadice’ye münhasıra ve tashîh-i mes’elesi on altı sehimden olup sihâm-ı mezbûreden dört sehmi zevc-i mezbûr Mehmed Beşe’ye ve altı sehmi sagīr-i mezbûr İsmail’e ve üçer sehmi mezbûretân Ümmühani ve Hadice’ye isâbeti tahkīkinden sonra zâtlarını bi’l-ma‘rifeti’ş-şer‘iyye ârifân Osman Çelebi b. el-Hâc Mustafa ve es-Seyyid Mustafa b. Abdurrahman ta‘rîfleriyle ve bulûğuna mu‘arrefe merkūme Hadice meclis-i şer‘-i şerîf-i enverde tereke-i müteveffât-ı mezbûra bi’l-verâse vâzı‘u’l-yed olan üvey babaları işbu râfi‘u’l-kitâb mezbûr Mehmed Beşe mahzarında her biri ikrâr ve takrîr-i kelâm edip vâlidemiz müteveffât-ı mezbûrenin terekesi tahrîr ve ba‘de ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere hisselerimize isâbet eden sekizer bin sekizer akçeyi vâlidemiz müteveffât-ı mezbûrenin terekesinden olmak üzere üvey babamız mezbûr Mehmed Beşe bize def‘ ü teslîm biz dahi meblağ-ı mezbûr sekizer bin sekizer akçeyi her birimiz yedinden bi’t-tamâm ve’l-kemâl ahz u kabz edip ba‘de’l-yevm vâlidemiz müteveffât-ı mezbûrenin terekesinden üvey babamız mezbûr Mehmed Beşe yedinden zimmetinde bir akçe ve bir habbe hakkımız bâkī kalmayıp husûs-ı mîrâsa müte‘llıka âmme-i da‘vâdan üvey babamız merkūm Mehmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sâdis ve’l-ışrîn min-Rebî‘i’l-âhir li-sene selâsîn ve mi’e ve elf. Şuhûdü’l-hâl: Halil Çelebi b. Osman, Ali Beşe b. Mustafa, Hasan Beşe b. Mustafa, Ali Beşe b. İbrahim, Mehmed Efendi b. Ahmed el-İmâm, Hüseyin Beşe b. el-Hâc Mustafa.