Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 174 Hüküm no: 129 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin oğlu Süleyman’ın terekesinden zevcesinin mehr-i müeccelini talebi Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı mahallesi ahâlîsinden olup mahrûse-i Edirne’de müsâfereten sâkin iken bundan akdem vefât eden Süleyman b. Hüseyin’in zevce-i metrûkesi olup zâtı mahalle-i mezbûrda sâkin Ali Çelebi b. Mustafa ve medîne-i mezbûrda Sofular mahallesinde sâkin Abdullah b. Abdurrahman ta‘rîfleriyle mu‘arrefe olan Zeyneb Hatun bt. Hüseyin meclis-i [şer‘-i] şerîf-i enverde müteveffâ-yı mezbûrun terekesine bi’l-verâse vâzı‘u’l-yed olan Hüseyin Çavuş b. Abdullah mahzarında üzerine da‘vâ ve takrîr-i kelâm edip zevcim müteveffâ-yı mezbûr Süleyman b. Hüseyin b. Abdullah tezevvüc murâd ettikde târîh-i kitâbdan dokuz ay mukaddem huzûr-ı Müslimînde beni bin iki yüz akçe mehr-i müeccel tesmiyesiyle tezevvüc ve kabûl edip akd ü nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve akîbe’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrân Ali Çelebi b. Mustafa ve Abdullah Çelebi b. Abdurrahman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Süleyman b. Hüseyin b. Abdullah tezevvüc murâd ettikde târîh-i kitâbdan dokuz ay mukaddem huzûrumuzda işbu müdde‘iye-i mezbûreyi bin iki yüz akçe mehr-i müeccel tesmiyesiyle tezevvüc ve kabûl edip ve akd ü nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sânî min-Cemâziyelâhir li-sene selâsîn ve mi’e ve elf. Şuhûdü’l-hâl: İsmail Efendi b. el-Hâc Osman, Mehmed Çelebi b. Mustafa, Osman Ağa b. Mustafa, Abdi Çelebi b. Mehmed Efendi, Abdurrahman Çelebi b. Molla Mehmed, es-Seyyid Mustafa b. Sefer, Mustafa Çelebi b. Abdurrahman, Mustafa efendi b. Hüseyin, es-Seyyid Süleyman Çelebi b. es-Seyyid Mehmed ve gayruhüm [mine’l-] hâzırîn.