Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 180 Hüküm no: 134 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa oğlu es-Seyyid Mehmed’in terekesinden zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîri içün bu fakīr Havâss-ı Refî‘a kazâsı muzâfâtından Çatalca nâhiyesine tâbi‘ Orçunlu nâm karyede sâkin iken bundan akdem vefât eden es-Seyyid Mehmed b. Mustafa’nın ile’l-vefât menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun zevce-i menkûha-i metrûkesi olup zâtı Mehmed Beşe b. Ahmed ve Mahmud Beşe b. Mustafa ta‘rîfleriyle mu‘arrefe olan işbu râfi‘atü’l-kitâb Âişe Hatun bt. Mustafa meclis-i ma‘kūd-ı mezkûrda müteveffâ-yı mezbûrun terekesine bi’l-verâse vâzı‘u’l-yed olan li-eb er karındaşı İsmail Beşe mahzarında üzerine da‘vâ ve takrîr-i kelâm edip zevcim müteveffâ-yı mezbûr es-Seyyid Mehmed b. Mustafa b. Süleyman tezevvüc murâd ettikde beni beş bin altı yüz akçe mehr-i müeccel tesmiyesiyle târîh-i kitâbdan altı sene mukaddem huzûr-ı Müslimînde tezevvüc ve kabûl edip akd ü nikâh beynimizde kāim iken meblağ-ı mezbûru [kable’]l-edâ fevt olmağla terekesinden taleb ederim suâl olunsun dedikde gıbbe’s-suâl ve akībe’l-inkâr müdde‘iye-i mezbûre Âişe Hatun’da n müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden karye-i mezbûre sâkinlerinden mu‘rrefân-ı mezbûrân Mehmed Beşe ve Mahmud nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr es-Seyyid Mehmed b. Mustafa b. Süleyman tezevvüc murâd ettikde işbu müdde‘iye-i mezbûre Âişe Hatun’u beş bin altı yüz akçe mehr-i müeccel tesmiyesiyle târîh-i kitâbdan altı sene mukaddem huzûrumuzda tezevvüc ve kabûl edip akd ü nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sâdis min-Cemâziyelâhir sene 1130 Şuhûdü’l-hâl: Es-Seyyid Mustafa b. Süleyman, Hasan Efendi b. Abdullah, Ali Beşe b. Hüseyin, Mehmed Beşe b. Sefer, Mehmed Çelebi b. Musa, Hasan Beşe b. Hüseyin.