Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 198 Hüküm no: 153 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Mustafa Beşe’nin terekesinden Kasap Ahmed oğlu Mehmed Beşe’nin ortaklıktan olan koyun hakkını talebi Kasâb tâifesinden işbu râfi‘u’l-kitâb Mehmed Beşe b. Ahmed meclis-i şer‘-i şerîf-i enverde medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât eden Mustafa Beşe b. Mehmed’in evlâd-ı sıgārının vâlideleri ve tesviye-i emrlerine kıbel-i şer‘den mansûbe vasiyeleri olan Âişe Hatun bt. Abdullah tarafından husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mustafa Çelebi b. İbr[a]him ve Ali Çelebi b. Musa şehâdetleriyle sâbit ve sübût-ı vekâletine hükm-i şer‘î lâhık olan Mustafa Çelebi b. Osman mahzarında üzerine da‘vâ ve takrîr-i kelâm edip müteveffâ-yı mezbûr Mustafa Beşe b. Mehmed b. Yunus ile kasâblık san‘atında şerîk-i inân ile olup işbu aynı mevcûd olan yüz elli koyunun ellisi müteveffâ-yı mezbûr Mustafa Beşe’nin ve ellisi Boşku nam zimmînin ve ellisi benim olup hattâ müteveffâ-yı mezbûr fevtinden yirmi gün mukaddem şirket-i mezkûru huzûr-ı Müslimînde ikrâr ve işhâd dahi edip kable’t-tefrîk fevt olmağla vekîl-i mezbûr Mustafa Çelebi mârrü’z-zikr koyunları müteveffâ-yı mezbûrun terekesinden olmak üzere kabz etmekle suâl olunup mârrü’z-zikr koyunların ellisinden kasr-ı yed edip bana teslîme tenbîh olunmak matlûbumdur dedikde gıbbe’s-suâl mezbûr Mustafa Çelebi koyunlara bi’l-vekâle vaz‘-ı yedini ikrâr lakin şirket-i mezkûru inkâr edicek müdde‘î-i mezbûr Mehmed Beşe’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrda Emîr Buhârî mahallesi sâkinlerinden Mehmed Çelebi b. Ali ve Mustafa Beşe b. İbrahim nam kimesneler li-ecli’ş-şehâde meclis-i şer‘a hâzırân olup istişhâd olunduklarında fî’l-hakīka müteveffâ-yı mezbûr Mustafa Beşe b. Mehmed b. Yunus ile kasâblık san‘atında şirket-i inân ile şerîk olup işbu aynı mevcûd olan yüz elli koyunun ellisi müteveffâ-yı mezbûrun ve ellisi Boşku nam zimmînin ve ellisi müdde‘î-i mezbûrun mülküdür deyu hatta müteveffâ-yı mezbûr Mustafa Beşe fevtinden yirmi gün mukaddem huzûrumuzda ikrâr ve bizi işhâd eyledi biz husûsa bu vech üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince mârrü’z-zikr koyunların ellisinden kasr-ı yed edip müdde‘î-i mezbûr Mehmed Beşe’ye teslîme vekîl-i mezbûr Mustafa Çelebi’ye ba‘de’t-tenbîh mâ-vaka‘a bi’t-taleb ketbolundu. Fi’l-yevmi’l-hâmis aşer min-Recebi’l-ferd li-sene selasîn ve mi’e ve elf. Şuhûdü’l-hâl: el-Hâc İbr[a]him b. Maksud, Mustafa Çelebi b. Osman, Ömer Beşe b. Mehmed, Mustafa Çelebi b. İbrahim, Mehmed Bey b. Ahmed, Mehmed Ağa b. Ali.