Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 197 Hüküm no: 152 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Mustafa Beşe’nin terekesinden zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup umûrları medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât Mustafa Beşe b. Mehmed’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun zevce-i menkûha-i metrûkesi olup zât İmâm Mustafa Efendi b. el-Hâc Mehmed ve Mehmed Efendi b. Ali, ta‘rîfleriyle ma‘rûfe olan işbu râfi‘atü’l-kitâb Âişe Hatun b. Abdullah meclis-i ma‘kūd-ı mezkûrda tashîhan li’d-da‘vâ vasî nasb olunan Mustafa Çelebi b. Ali mahzarında üzerine da‘vâ ve takrîr-i kelâm edip zevcim müteveffâ-yı mezbûr Mustafa Beşe b. Mehmed b. Yunus tezevvüc murâd ettikde târîh-i kitâbdan on üç sene mukaddem üç bin beş yüz akçe mehr-i müeccel tesmiyesiyle huzûr-ı Müslimînde beni tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûre Âişe Hatun’da n müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden mu‘arrifân-ı mezbûrân İmâm Mustafa Efendi b. el-Hâc Mehmed ve Mehmed Efendi b. Ali nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fî’l-hakīka müteveffâ-yı mezbûr Mustafa Beşe b. Mehmed b. Yunus tezevvüc murâd ettikde târîh-i kitâbdan on üç sene mukaddem üç bin beş yüz akçe mehr-i müeccel tesmiyesiyle işbu müdde‘iye-i mezbûre Âişe Hatun’u huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl [53a] ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli Mevlânâ-yı mezbûr mahallinde ketb ü tahrîr ba‘d[e] ma‘an ba‘s olunan es-Seyyid Mustafa b. Sefer ve Mehmed b. İslam ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’l-hâmis aşere min-Recebi’l-ferd sene 1130. Şuhûdü’l-hâl: el-Hâc İbr[a]him b. Maksud, Mustafa Çelebi b. Osman, Ömer Çelebi b. Mehmed. Mustafa b. İbr[a]him, Abdurrahman b. Abdulkerim, Mehmed Ağa b. Ali, Mehmed Bey b. Ahmed.