Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 200 Hüküm no: 155 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Maksud oğlu el-Hac İbrahim’in ortağı Mehmed oğlu Mustafa Beşe’nin terekesinden hissesini talebi Taşçı tâifesinden işbu râfi‘u’l-kitâb el-Hâc İbrahim b. Maksud nâm kimesne meclis-i şer‘-i şerîf-i enverde medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât Mustafa Beşe b. Mehmed’in evlâd-ı sıgārının vâlideleri ve tesviye-i emirlerine kıbel-i şer‘den mansûbe vasiyeleri olan Âişe Hatun bt. Abdullah tarafından husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mustafa Çelebi b. İbr[a]him ve Ali Çelebi b. Musa şehâdetleriyle sâbit ve sübût-ı vekâletine hükm-i şer‘î lâhık olan Mustafa Çelebi b. Osman mahzarında üzerine da‘vâ ve takrîr-i kelâm edip müteveffâ-yı mezbûr Mustafa Beşe b. Mehmed b. Yunus ile taşçılık san‘atında şirket-i inân ile şerîk olup işbu mevcûd ve müşâhede olunan taşın nısfı müteveffâ-yı mezbûr Mustafa Beşe’nin ve nısf-ı âharı benim olup hattâ müteveffâ-yı mezbûr fevtinden yirmi gün mukaddem şirket-i mezkûru huzûr-ı Müslimînde ikrâr ve işhâd dahi edip kable’t-tefrîk fevt olmağla vekîl-i mezbûr Mustafa Çelebi mârrü’z-zikr taşları müteveffâ-yı mezbûrun terekesinden olmak üzere kabz etmekle suâl olunup mârrü’z-zikr taşların nısfından kasr-ı yed edip bana teslîme tenbîh olunmak matlûbumdur dedikde gıbbe’s-suâl mezbûr Mustafa Çelebi taşlara bi’l-vekâle vaz‘-ı yedini ikrâr lâkin şirket-i mezkûru inkâr edicek müdde‘î-i mezbûr el-Hâc İbrahim’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrede Otakçıbaşı mahallesi sâkinlerinden İmâm el-Hâc Mehmed Efendi b. İbrahim ve Mehmed Çelebi b. Ali nam kimesneler li-ecli’ş-şehâde meclis-i şer‘a hâzırân olup istişhâd olunduklarında fî’l-hakīka müteveffâ-yı mezbûr Mustafa Beşe b. Mehmed b. Yunus ile taşçılık san‘atında şirket-i inân ile şirket [şerîk] olup işbu mevcûd ve müşâhede olunan taşın nısfı müteveffâ-yı mezbûrun ve nısf-ı âharı işbu müdde‘î-i mezbûr el-Hâc İbrahim’in mülküdür deyu hatta müteveffâ-yı mezbûr Mustafa Beşe fevtinden yirmi gün mukaddem huzûrumuzda ikrâr ve bizi işhâd dahi eyledi biz bu husûsa bu vech üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince mârrü’z-zikr taşların nısfından kasr-ı yed edip el-Hâc İbrahim’e teslîme vasiyye-i mezbûre Âişe Hatun’a ba‘de’t-tenbîh mâ-vaka‘a bi’t-taleb ketbolundu. Fi’l-yevmi’l-hâmis aşer min-Recebi’l-ferd li-sene selasîn ve mi’e ve elf. Şuhûdü’l-hâl: El-Hâc İbrahim b. Maksud, Mustafa Çelebi b. Osman, Ömer Beşe b. Mehmed, Mustafa b. İbrahim, Abdurrahman b. Abdulkerim, Mehmed Ağa b. Ali, Mehmed Bey b. Ahmed.