Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 201 Hüküm no: 156 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Menco oğlu Peno’nun, Mehmed oğlu Mustafa Beşe’nin terekesinden koyun bedelini talebi Husûs-ı âti’l-beyânın mahallinde istimâ‘ ve tahrîr[i] için savb-ı enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât [eden] Mustafa Beşe b. Mehmed’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde çoban tâifesinden işbu râfi‘u’s-sifr Peno veled-i Menco nam zimmî meclis-i ma‘kūd-ı mezkûrda müteveffâ-yı mezbûrun evlâd-ı sıgārının vâlideleri olup ve tesviye-i emrlerine kıbel-i şer‘den vasiyeleri olmağla tereke-i müteveffâ-yı mezbûra bi’l-vesâye vazı‘atü’l-yed olan Âişe Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Mustafa Beşe b. Mehmed b. Yunus zimmetinde beynimizde ma‘lûm koyun semeninden altı bin sekiz yüz on akçe [54b] hakkım olup hattâ müteveffâ-yı mezbûr fevtinden on gün mukaddem ( ) mezkûrdan bana deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb edip suâl olunsun dedikde gıbbe’s-suâl ve akıbü’l-inkâr müdde‘î-i mesfûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrede Emîr Buhârî mahallesi sâkinlerinden Mustafa Beşe b. İbr[a]him ve Mehmed Çelebi b. Ali nam kimesneler li-ecli’ş-şehâde meclis-i mezkûra hâzırân olup istişhâd olunduklarında fi’l-hakīka müteveffâ-yı mezbûr Mustafa Beşe b. Mehmed b. Yunus zimmetinde beynlerinde ma‘lûm koyun semeninde[n] altı bin sekiz yüz on akçe işbû müdde‘î-i mesfûra deynim vardır deyu fevtinden on gün mukaddem ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘de ma‘an ba‘s olunan es-Seyyid Mustafa b. Sefer ve Mehmed b. İslam ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’l-hâmis min-Recebi’l-ferd li-sene selasîn ve mi’e ve elf. Şuhûdü’l-hâl: Ali Çelebi b. Musa, Ahmed Çelebi b. Ebubekir, İbr[a]him Çelebi b. Mustafa, Ali Çelebi b. Maksud, es-Seyyid Süleyman b. es-Seyyid Mehmed, Mehmed Çelebi b. Abdullah.