Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 206 Hüküm no: 161 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu el-Hac İbrahim Ağa’nın, Mehmed oğlu Süleyman Ağa terekesinden alacağını talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup umûrları medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Sofular mahallesinde sâkin el-Hâc İbrahim Ağa b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde mezbûr el-Hâc İbrahim Ağa meclis-i ma‘kūd-ı mezkûrda medîne-i mezbûrede Cezerî Kasımpaşa mahallesinde sâkin iken bundan akdem vefât eden Süleyman Ağa b. Mehmed’in vilâyet-i <> Anadolu’da Gölhisar kazâsında sâkin li-ebeveyn er karındaşları Ömer Ağa ve Osman Ağa nam kimesnelerin hisse-i mevkūfelerini ahz u kabz ve zabt u hıfz[a] kıbel-i şer‘den vasî ve kayyım nasb olunan eş-Şeyh Abdullah Efendi b. eş-Şeyh Mahmud Efendi mahzarında üzerine da‘vâ ve takrîr-i kelâm edip müteveffâ-yı mezbûr Süleyman Ağa b. Mehmed b. Abdullah zimmetinde üç yüz yirmi guruş hakkım olup hattâ müteveffâ-yı mezbûr meblağ-ı merkūm üç yüz yirmi guruşu vâcibü’l-edâ bana deyni olduğunu fevtinden on beş gün mukaddem huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûr İbrahim Ağa’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden sâlifü’z-zikr Sofular mahallesinde sâkin İsmail Efendi b. el-Hâc Osman ve Hüseyin Çelebi b. Hasan nam kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fî’l-hakīka müteveffâ-yı mezbûr Süleyman Ağa b. Mehmed b. Abdullah zimmetinde üç yüz yirmi guruş işbu müdde‘î-i mezbûr el-Hâc İbrahim Ağa’ya vâcibü’l-edâ deyni olduğunu fevtinden on beş gün mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘de ma‘an ba‘s olunan es-Seyyid Mustafa b. Sefer ve Mehmed b. Abdullah ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’l-âşir min-Şa‘bâni’l-mu‘azzam [li]-sene selasîn ve mi’e ve elf. Şuhûdü’l-hâl: Abdullah Ağa b. Kethüdâ-i Aktarlar, Ahmed Ağa b. Mustafa, el-Hâc Ahmed b. Ebubekir, el-Hâc Süleyman b. Ali, Salih Çelebi b. Ali, es-Seyyid Süleyman b. es-Seyyid Mehmed.