Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 205 Hüküm no: 160 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilenci Lefter oğlu Duka’nın, Mehmed oğlu Süleyman Ağa terekesinden alacağını talebi Dilenci tâifesinden işbu râfi‘u’s-sifr Duka v. Lefter nam zimmî meclis-i şer‘-i enverde medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Süleyman Ağa b. Mehmed’in li-ebeveyn er karında<<şı>>ları olup vilâyet-i Anadolu’da Gölhisar kazâsında sâkin gāib ani’l-meclis Ömer Ağa <> ve Osman Ağa nam kimesnelerin hisse-i mevkūfelerini ahz u kabz ve zabt u hıfza kıbel-i şer‘den vasî ve kayyım nasb olunan eş-Şeyh Abdullah Efendi b. eş-Şeyh Mahmud Efendi mahzarında üzerine da‘vâ ve takrîr-i kelâm edip müteveffâ-yı mezbûr Süleyman Ağa b. Mehmed b. Abdullah zimmetinde emti‘a bahâsından on beş guruş hakkım olup hattâ müteveffâ-yı mezbûr fevtinden on gün mukaddem bana ol-mikdâr guruş deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrda Sofular mahallesinde sâkin İbr[a]him Ağa b. Mehmed ve Süleyman Ağa b. Mustafa nam kimesneler li-ecli’ş-şehâde meclis-i şer‘a hâzırân olup istişhâd olunduklarında fî’l-hakīka müteveffâ-yı mezbûr Süleyman Ağa b. Mehmed b. Abdullah işbu müdde‘î-i mesfûr zimmetinde emti‘a bahâsından on beş guruş deyni olduğunu fevtinden on gün mukaddem huzûrumuzda ikrâr ve bizi işhâd eyledi biz bu husûsa bu vecih üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î [56a] mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sânî min-Şa‘bâni’l-mu‘azzam li-sene selasîn ve mi’e ve elf. Şuhûdü’l-hâl: El-Hâc Mehmed b. Ebubekir, Mustafa Efendi b. Hüseyin, es-Seyyid Mustafa b. Sefer, İsmail Efendi b. el-Hâc Osman, Mehmed Çelebi b. Abdullah.