Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 207 Hüküm no: 163 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman oğlu Abdullah Bey’in terekesinden babasının hissesine düşeni aldığı Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-mahallâtından Evlice Baba mahallesi ahâlîsinden iken bundan akdem <> Ko[r]f[os] muhârebesinde şehîden vefât eden Abdullah Bey b. Süleyman’ın verâseti zevce-i menkûha-i metrûkesi Ümmü Gülsüm Hatun bt. Salih Çelebi ile babası mezbûr Süleyman b. Abdullah ve sulbiye sagīre kızı Fâtıma’ya münhasıra ve tashîh-i mes’elesi sekiz sehimden olup sihâm-ı mezbûrenin bir sehmi zevcesi mezbûre Ümmü Gülsüm’e ve üç sehmi babası mezbûr Süleyman’a ve dört sehmi sagīre-i mezbûre Fâtıma’ya isâbeti tahkīkinden sonra mezbûr Süleyman meclis-i şer‘-i şerîf-i enverde müteveffâ-yı mezbûrun zevce-i metrûkesi ve sagīre-i mezbûre Fâtıma’nın vâlidesi ve tesviye-i umûruna kıbel-i şer‘den mansûbe vasîsi olmağla tereke-i müteveffâ-yı mezbûra bi’l-vesâye ve bi’l-verâse vâzı‘atü’l-yed olan mezbûre Ümmü Gülsüm Hatun tarafından vekîl-i meclisi olan babası işbu bâisü’l-kitâb mezbûr Salih Çelebi b. Mehmed mahzarında ikrâr ve takrîr-i kelâm edip oğlum müteveffâ-yı mezbûrun terekesi tahrîr ve ba‘de ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere hisseme isâbet eden beş bin sekiz yüz kırk beş akçeyi terekeden olmak üzere vekîl-i mezbûr Salih Çelebi bana def’‘ ve teslîm ben dahi yedinden bi’t-tamâm ve’l-kemâl alıp kabz eyledim meblağ-ı mezbûr beş bin sekiz yüz kırk beş akçeden mezbûre Ümmü Gülsüm Hatun [ve] vekîl-i mezbûr Salih Çelebi yedlerinde ve zimmetlerinde bir habbe bâkī kalmayıp oğlum müteveffâ-yı mezbûrun terekesinden hâric ez [de]fter ve dâhil-i defter kalîl u kesîr [ve] celîl [u] hakīr tereke-i ma‘lûm ve mechûleye müte‘allika [57a] âmme-i de‘âvî ve mutâlebât ve eymân [ve] muhâsamâtdan müvekkile-i mezbûre Ümmü Gülsüm Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sâbi‘ ve aşer min-Şa‘bâni’l-mu‘azzam sene 1130. Şuhûdü’l-hâl: Mehmed Efendi b. Ahmed el-imâm, Osman Efendi b. el-Hâc Mustafa el-müezzin, Ömer Çelebi b. el-Hâc Mustafa, Mehmed Çelebi b. İbr[a]him, Mustafa Efendi b. Hüseyin, İsa Beşe Yoğurtçu, Süleyman b. Musa, Mehmed Çelebi b. Abdullah, es-Seyyid Mustafa b. Sefer, es-Seyyid Süleyman b. es-Seyyid Mehmed.