Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 208 Hüküm no: 164 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir kızı Hadice Hatun’un terekesinden kızının vasisi tarafından yapılan masrafların muhasebesi Medîne-i hazret-i Ebâ Eyyüb el-Ensârî -aleyhi [rahmetü] Rabbihi’l-Bârî-’de Câmi‘-i Kebîr mahallesinde sâkine iken bundan akdem vefât eden Hadice Hatun bt. Ebubekir’in sadriye sagīre kızı Âişe’nin tesviye-i umûruna kıbel-i şer‘den mansûb vasîsi olan ceddi mezbûr Ebubekir’in üzerine hasbî nâzırı sagīre-i mezbûrenin babası Mehmed b. Ahmed ma‘rifetiyle bin yüz yirmi bir senesinden [senesinin] Cemâziyelâhi rinin onuncu gününden bin yüz otuz senesi Şa‘bân-ı şerîfi[ni]n on beşinci gününe gelince dokuz sene iki ay ile vasiyy-i mezbûrun makbûzu ve masrafı muhâsebe defteridir ki ber-vech-i âtî zikrolunur. Fi’l-yevmi’l-âşir min Şa‘bâni’l-mu‘azzam li-sene selasîn ve mi’e ve elf. Vâlidesi müteveffât-ı mezbûrdan sagīr-i mezbûra ber-mûceb-i defter-i kassâm-ı askerî isâbet eden Meblağ 7189 akçe Müteveffâ-yı mezbûreden sagīre-i mezbûra intikāl eden yedi buçuk seneden menzil icâresinden vasiyy-i mezbûrun makbûzu Meblağ 10200 akçe Cem‘an yekûn 17389 akçe Minhe’l-masârıf Sagīr-i mezbûrun dokuz sene iki ayda bâ-hüccet-i şer‘iyye nafaka-i mefrûzasına vasiyy-i mezbûrun verdiği Meblağ 22020 akçe Vasiyy-i mezbûrun dokuz sene iki ayda sagīr-i mezbûrenin menzil icâresine verdiği akçe Meblağ 2160 akçe Sagīr-i mezbûrenin vasiyy-i mezbûrun menzil-i müntakilesinin ta‘mîrine sarf eylediği Meblağ 1800 akçe Harc-ı defter-i muhâsebe masrûf Meblağ 60 akçe Harc-ı defter-i kalemiyye ve Hüddâmiye ve kaydiyye Meblağ 60 akçe Cem‘ân yekûn 26100 akçe Vasiyy-i mezbûr Ebubekir dokuz sene iki ayda kabz eylediği on yedi bin üç yüz <> seksen dokuz akçeden mâ‘adâ kendi mâlından sekiz bin yedi yüz on bir akçe sagīr-i mezbûrenin mefrûzasına ve sâir levâzımına sarf etmekle meblağ-ı mezbûr mutâlebesinden sagīr-i mezbûrenin zimmetini ibrâ ve ıskāt ey[ledi]ği bu mahalle şerh verildi.