Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 211 Hüküm no: 168 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed oğlu Mustafa Efendi’nin terekesinden zevcesinin mehr-i müeccelini talebi Husûs-ı âti’l-beyânın mahallinde <>istimâ‘ ve tahrîri için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Sofular mahallesinde sâkin iken bundan akdem vefât eden Mustafa Efendi b. Ahmed’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i Ahmedî ettikde müteveffâ-yı mezbûrun zevce-i menkûha-i metrûkesi olup zâtı mahalle-i mezbûrede sâkin Ahmed Efendi b. Mustafa ve Abdulfettah Efendi b. Mustafa mu‘arrefe olan işbu râfi‘atü’l-kitâb Hadice Hatun bt. Mustafa meclis-i ma‘kūd-ı mezkûrda müteveffâ-yı mezbûrun terekesine bi’l-verâse vazı‘atü’l-yed olan kebîre kızı Âişe Hatun mahzarında üzerine da‘vâ ve takrîr-i kelâm edip zevcim müteveffâ-yı mezbûr Mustafa Efendi b. Ahmed b. Abdullah tezevvüc murâd ettikde târîh-i kitâbdan yirmi dört sene mukaddem altı bin akçe mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynimizda kāim iken meblağ-ı mezbûru kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden müte‘arrifân-ı mezbûrân Ahmed Efendi ve Abdulfettah Efendi li-ecli’ş-şehâde meclis-i mezkûra hâzırân olup isre’l-istişhâd ve fî’l-hakīka müteveffâ-yı mezbûr Mustafa Efendi b. Ahmed b. Abdullah tezevvüc murâd ettikde târîh-i kitâbdan yirmi dört sene mukaddem işbu müdde‘iye-i mezbûre Hadice Hâtun’[u] altı bin akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi [58b] biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl [ve’t-tezkiye] şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’r-râbi‘ aşer min-Şa‘bâni’l-mu‘azzam sene 1130. Şuhûdü’l-hâl: Mustafa Efendi b. Mahmud Efendi, İsmail Efendi b. el-Hâc Osman, Mustafa Efendi b. Hüseyin, es-Seyyid Mustafa b. Sefer, Mehmed Çelebi b. Çukadâr.