Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 211 Hüküm no: 167 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed oğlu Mustafa Efendi’nin erkek kardeşine vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Sofular mahallesinde sâkin iken bundan akdem vefât [eden] fahrü’l-kuzât Mustafa Efendi b. Ahmed’in vilâyet-i Anadolu’da Güzelhisar kazâsında sâkin li-ebeveyn er karındaşı Mehmed’in hisse-i mevkūfesini ahz u kabz [ve] zabt ve hıfza kıbel-i şer‘den bir vasî nasbı lâzım ve mühim olmağın emânet ile ma‘rûfe diyânet ile mevsûfe her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan müteveffâ-yı mezbûrun zevcesi işbu râfi‘atü’l-kitâb Hadice Hatun bt. Mustafa’yı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi gāib-i mezbûr Mehmed’in hisse-i mevkūfesini ahz u kabz [ve] zabt u hıfza kıbel-i şer‘den vasî ve kayyım nasb ve ta‘yîn buyurduklarında ol dahi vesâyet-i mezbûre[yi] kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Şa‘bâni’l-mu‘azzam sene 1130. Şuhûdü’l-hâl: Ahmed Efendi b. Mustafa, Mustafa Efendi b. Türbedâr-zâde, İsmail Efendi b. el-Hâc Osman, Mustafa Efendi b. Hüseyin.