Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 216 Hüküm no: 172 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Hadice Hatun’un oğluna vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-mahallâtından Defterdar Kara Süleyman mahallesinde sâkine iken bundan akdem vefât eden Hadice Hatun bt. Abdullah’ın sadrî sagīr oğlu Mehmed Emin’in vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan işbu râfi‘u’l-kitâb sagīr-i mezkûrun babası Ebubekir Çelebi b. Mehmed’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd ü sedâdına değin vasî nasb ve ta‘yîn edip ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmekle mâ-vaka‘a bi’t-taleb ketbolundu. Fi’l-yevmi’s-sâbi ve’l-ışrîn min-Ramazâni’l-mübârek li-sene selasîn ve mi’e ve elf. Şuhûdü’l-hâl: Abdullah Ağa b. Mehmed, Hüseyin Ağa b. Ahmed, Mehmed Ağa b. Ömer, Mehmed Çelebi b. Hızır, Salih Çelebi b. Abdullah, es-Seyyid Mustafa b. Sefer, Ali Çelebi b. Mehmed.