Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 217 Hüküm no: 173 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Hadice Hatun’un oğluna nafaka takdiri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Defterdar Kara Süleyman mahallesinde sâkine iken bundan akdem vefât eden Hadice Hatun bt. Abdullah’ın sadrî sagīr oğlu Mehmed Emin’in babası ve tesviye-i umûruna kıbel-i şer‘den mansûb vasîsi olan işbu râfi‘u’l-kitâb Ebubekir Çelebi b. Mehmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîsi olduğum sagīr-i mezbûrun nafaka ve kisve bahâya eşedd-i ihtiyâcı olmağla vâlidesi müteveffât-ı mezbûr[e]den müntakil mâlından kadr-i ma‘rûf nafaka ve kisve farz ve takdîr olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vâlidesi müteveffâ-yı mezbûrdan müntakil mâlından beher yevm altışar akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve bahâsına harc ve sarfa ve lede’l-iktizâ istidâneye ve inde’z-zafer mâlından rücû‘a vasiyy-i mezbûr Ebubekir Çelebi’ye izin vermeğin mâ-vaka‘a bi’t-taleb ketbolundu. Fi’l-yevmi’s-sâbi‘ ve’l-ışrîn min-Ramazâni’l-mübârek li-sene selasîn ve mi’e ve elf. Şuhûdü’l-hâl: Mustafa Efendi b. Hüseyin, Abdullah Ağa b. Mehmed, Hüseyin Ağa b. Ahmed, Mehmed Çelebi b. Hızır, Salih Çelebi b. Abdullah, es-Seyyid Mustafa b. Sefer, Ali Çelebi b. Mehmed.