Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 223 Hüküm no: 176 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Murad oğlu Muharrem Efendi’nin Rus asıllı cariyesinin satılmasına izin talebi Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Defterdar Kara Süleyman mahallesinde sâkin iken bundan akdem vefât eden Muharrem Efendi b. Murad’ın sulbiye sagīre kızı Fâtıma’nın tesviye-i umûruna vasiyy-i muhtârı olan işbu râfi‘u’l-kitâb Mehmed Çelebi b. Hızır meclis-i şer‘-i şerîf-i enverde takrîr-i kelâm ve ta‘bîr ani’l-merâm edip müteveffâ-yı mezbûrun memlûkesi olan Rusiyyetü’l-asl Müslimetü’l-millet Havva nam sagīre câriyesi merkūme Fâtıma’nın hizmetine kādire olmamağla câriye-i mezkûre sûk-ı sultânîde semen-i misliyle bey‘ ve semen-i istirbâh olunmak sagīr-i mezbûr hakkında evlâ ve enfa‘ olmağın kıbel-i şer‘den mezbûre Havva’nın bey‘ine izin verilmek matlûbumdur dedikde vasiyy-i mezkûrun kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi câriye-i mezbûreyi ba‘de’l-müzâyede ve inkıtâ‘ı’r-rağbe semen-i misliyle âhara bey‘a vasiyy-i mezbûr Mehmed Çelebi’ye izin vermeğin mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene selasîn ve mi’e ve elf. Şuhûdü’l-hâl: Mustafa Efendi b. Hüseyin, Ali Çelebi b. Mehmed, Abdullah Ağa b. Mehmed, Mehmed Ağa b. Ömer, es-Seyyid Mehmed Ağa b. Mustafa, es-Seyyid Mustafa b. Sefer.