Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 224 Hüküm no: 177 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İstemat kızı Pereşkova’nın, kendinden önce ölen oğlu Nikola’nın terekesine ait hissesinin vârislerine devri Havâss-ı Refî‘a kazâsı muzâfâtından Terkos nâhiyesine tâbi‘ Boğaz nam karyed[e] sâkin iken bundan akdem hâlik olan Nikola v. Şiro nam zimmînin verâseti zevce-i metrûkesi Plaşe bt. Yani nâm Nasrâniyye ile anası Pereşkova bt. İstemat ve sulbî oğulları Yamandi ve Leonderye ve sulbiye kızı Şenadi’ye münhasıra olup kable’l-kısme mezbûre Peraşkova dahi hâlik olup verâseti sadrî kebîr oğulları Anderya ve Vasili’ye münhasıra oldukdan sonra kendi tarafından asâleten ve karındaşı mezbûr Vasili tarafından husûs-ı âti’l-beyânda vekîl olduğu Karye-i mezbûre sâkinlerinden Dimo veled-i Yovan ve Todor veled-i Dimitri şehâdetleriyle sâbit olan mezbûr Anderya meclis-i şer‘-i şerîf-i enverde hâlik-i evvel mezbûr Nikola’nın zevcesi olup terekesine bi’l-verâse vâzı‘atü’l-yed olan işbu râfi‘atü’s-sifr mezbûr Plaşe mahzarında bi’l-vesâye ve bi’l-vekâle ikrâr ve takrîr-i kelâm edip anamız hâlike-i mersûme [Pere]şkova oğlu hâlik-i merkūm Nikola’nın terekesinden isâbet eden hisse-i şâyi‘asını kable’l-ahz hâlik olmağla hâlâ mezbûre Plaşe’den anamız hâlike-i mezbûrenin hisse-i merkūmesini taleb ve da‘vâ eylediğimizde ta‘allül edip teslîmden imtinâ‘ etmekle beynimizde münâza‘ât-ı kesîre vâki‘ olmuşdu el-hâletü-hâzihi beynimizde muslihûn tavassut edip bizi yirmi guruş üzerine sulh eylediklerinde biz dahi sulh-ı mezkûru ba‘de’l-kabûl ve bedel-i sulh olan meblağ-ı mezbûr yirmi guruşu karındaşım müvekkil-i mezbûr Vasil ile alâ-kadri’l-hısas alıp kabz eyledik ba‘de’l-yevm hâlik-i mezbûrun terekesinden anamız hâlike-i mersûme Pereşkova’ya isâbet eden kalîl ü kesîr ve hakīr ü celîl ma‘lûme ve mechûle mirâs da‘vâsına müte‘allika âmme-i de‘âvîden mezbûre Plaşe’nin zimmeti bi’l-asâle ve bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eyledim dedikde mezbûr Plaşe’nin dahi bedel-i sulh-ı mezbûr yirmi guruş mutâlebesinden müvekkile-i mezbûr Vasil ile merkūm Anderya’nın zimmetlerini ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sânî aşer min-Zilka‘deti’ş-şerîfe es-sene selasîn ve mi’e ve elf. Şuhûdü’l-hâl: Mustafa Efendi b. Hüseyin, Ömer Efendi b. Mehmed, Mehmed Çelebi b. Hüseyin, Habib Çelebi b. Na‘lband, Hüseyin Beşe b. Mehmed, es-Seyyid Mustafa b. Sefer.