Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 227 Hüküm no: 180 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa oğlu el-Hac Ahmed’in kızına vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından el-Hâc Hüsrev mahallesinde sâkin iken bundan akdem vefât eden el-Hâc Ahmed Efendi b. Mustafa’nın sulbiye sagīre kızı Ümmü Gülsüm’ün tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfi‘atü’l-kitâb İsmihan Hatun bt. Mehmed’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd ü sedâdına değin vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’’r-râbi‘ min-Zilhicceti’ş-şerîfe li-sene selasîn ve mi’e ve elf. Şuhûdü’l-hâl: el-Hâc Mehmed Efendi b. İbrahim, Mustafa Efendi b. Hüseyin, İsmail Çelebi b. el-Hâc Ahmed, Hüseyin el-müezzin, el-Hâc Ahmed b. Abdullah, es-Seyyid Mustafa b. Sefer, es-Seyyid Mehmed b. Süleyman, es-Seyyid Ebubekir Çelebi b. Ebubekir ve gayruhüm.