Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 226 Hüküm no: 179 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli oğlu Ali Çelebi’nin, Tersane-i âmire kâtibi Osman oğlu Ali Efendi ile zevcesinden alacağının tahsili Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin Ali Çelebi b. Veli meclis-i şer‘-i şerîf-i enverde medîne-i mezbûrda Arakıyyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi [b.] Osman’ın zevce-i menkûha-i metrûkesi olup terekesine bi’l-verâse vâzı‘atü’l-yed olan Havva Hatun bt. el-Hâc Osman tarafından husûs-ı âti’l-beyânda vekîl olduğu zât-ı mezbûreyi bi’l-ma‘ri Boşko et-i şer‘iyye ârifân Mehmed Efendi b. Yusuf ve Süleyman Efendi b. Mehmed şehâdetleriyle sâbit olan Emetullah Hatun b. Bayram mahzarında ikrâr ve takrîr-i kelâm edip bundan akdem müteveffâ-yı mezbûr Ali Efendi zimmetinde cihet-i deyn-i şer‘îden bin altı yüz akçe hakkım olup ve müvekkile-i mezbûre Havva Hatun zimmetinde dahi beynimizde ma‘lûm incü bahâsından iki bin sekiz yüz akçe ve ...? bahâsından bin iki yüz altmış akçe ve cihet-i karzdan bin dokuz [yüz] yirmi akçe ki min-haysü’l-mecmû‘ müteveffâ-yı mezbûr ile müvekkil-i mezbûre Havva Hatun zimmetinde yedi bin yüz seksen akçeden müteveffâ-yı mezbûrun Tersâne-i âmire’de olan vâzifesinden iki [bin] iki yüz akçe ve müvekkile-i mezbûre Havva Hatun yedinden bin dokuz yüz altmış akçe kabz edip bâkī üç bin yirmi akçe hakkım vardır deyu taleb ve da‘vâ eylediğimde münâza‘ât-ı kesîre vâki‘ olmuşdu el-hâletü-hâzihi beynimizde muslihûn tavassut edip beni da‘vâ-yı mezkûremden yirmi guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yirmi guruşu vekîl-i mezbûr Emetullah Hatun yedinden bi’t-tamâm ve’l-kemâl ahz u kabz edip ba‘de’l-yevm müteveffâ-yı mezbûr Ali Efendi ve müvekkile-i mezbûr Havva Hatun ile da‘vâ ve nizâ‘ım kalmayıp müvekkile-i mezbûrenin zimmeti ibrâ-i âmm-ı katı‘u’n-nizâ‘la ibrâ ve ıskāt eyledikde vekîl-i mezbûre Emetullah Hatun dahi meblağ-ı mezbûr mutâlebesinden bi’l-vekâle mezbûr Ali Çelebi’nin zimmetini ibrâ ve ıskāt eyledim [de]dikde gıbbe’t-tasdîki’ş-şer‘î mezbûr Çelebi? meclis-i şer‘de vekîl-i mezbûre Emetullah Hatun mahzârında i‘âde-i kelâm edip mukaddem müteveffâ-yı mezbûr Ali Efendi b. Osman mâlına vasiyy-i muhtâr eyledi deyu da‘vâ etmişdim el-hâletü hâzihi da‘vâ-yı mezkûremden mubtıl olup [63a] benden ba‘de’l-yevm vesâyet da‘vâsı zuhûr ve sudûr ederse lede’l-hükkâmi’l-kirâm mesmû‘a eyle[n]mesün dedikde mâ-vaka‘a bi’t-taleb ketbolundu. Fi’l-yevmi’’s-sânî aşer min-Zilka‘deti’ş-şerîfe li-sene selasîn ve mi’e ve elf. Şuhûdü’l-hâl: İsmail Efendi b. el-Hâc Osman, Hüseyin Çelebi b. Mustafa, Mehmed Efendi b. İbr[a]him, Mehmed Çelebi, es-Seyyid Ebubekir b. Mehmed, el-Hâc Mustafa b. Berber, el-Hâc Mustafa b. el-Hâc İbrahim, Süleyman Çelebi b. Mehmed, Süleyman Çelebi b. Mehmed.