Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 236 Hüküm no: 189 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe b. Mustafa’nın terekesinden, Şems-i Pîrî Vakfı’ndan aldığı borcun ödenmesi talebi Medîne-i hazret-i Ebâ Eyyüb el-Ensârî |-dâme fî rıdvâni’l-Bârî-’de Câmi‘-i Kebîr mahallesinde sâkin Şems-i Pîrî Evkāfı’nın nükūd-ı mevkūfesine bi’l-fi‘il mütevellî olan işbu râfi‘u’l-kitâb Babazâde Mehmed Çelebi b. Mustafa meclis-i şer‘-i şerîf-i enverde medîne-i mezbûrede İslam Bey mahallesinde sâkin iken bundan akdem vefât eden Halil Beşe b. Mustafa’nın ba‘de’t-ta‘rîf-i şer‘î zevce-i menkûhası olub terekesine bi’l-verâse vâzı‘atu’l-yed olan Rabi‘a bt. Abdullah nâm Hatun mahzarında üzerine da‘vâ ve takrîr-i kelâm edip müteveffâ-yı mezbûr Halil Beşe b. Mustafa b. Abdullah işbu yedimde olan hüccet-i şer‘iyye nâtıka olduğu üzere târîh-i kitâbdan dört sene mukaddem mütevellîsi olduğum mârrü’z-zikr Şems-i Pîrî Evkāfı’nın nükūd ve mevkūfesinden onu on bir buçuk hesâbı üzere cihet-i karz-ı şer‘îden üç yüz guruş yedimden istikrâz ben dahi ikrâz edip meblağ-ı mezkûrun ber-vech-i muharrer hesâb-ı mezkûr üzere ribhi olan kırk beş guruşu devr-i şer‘î ile ilzâm-ı ribh ol dahi iltizâm ve kabûl eyleyip cem‘an üç yüz kırk beş guruşu ciheteyn-i mezkûreyn vakf-ı mezkûra deyni olduğunu mahzar-ı Müslimînde ikrâr ve işhâd dahi etmişdi meblağ-ı mezbûrdan yüz elli guruşu müteveffâ-yı mezkûrun hayâtında medyûndan bi’d-defe‘ât ahz ve istîfâ edip meblağ-ı mezbûrun bakī yüz doksan beş guruşu kable’l-edâ vefât etmeğin müteveffâ-yı mezkûrun [66a] terekesine mezkûre Rabi‘a Hatun vâzı‘atü’s-sebil olmağla talep eyledikde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb oldukda udûl-i ahrâr-ı ricâl-i Müslimînden sâlifü’z-zikr İslam Bey Mahallesi İmâmı Abdullah Efendi b. Ahmed ve İbrahim Çelebi b. Abdullah nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müdde‘î-i mezbûr Mehmed Halil’in yedinde olan hüccet-i şer‘iyye nâtıka olduğu üzere târîh-i kitâbdan dört sene mukaddem müteveffâ-yı mezbûr Halil Beşe b. Mustafa b. Abdullah hâl-i hayâtında onu on buçuk hesâbı üzere mâl-ı vakf-ı mezbûrdan mütevellî-i merkūm Babazâde Mehmed Çelebi yedinden cihet-i karz-ı şer‘îden üç yüz guruş istikrâz edip meblağ-ı mezbûrun hesâb-ı mezkûr üzere ribhi olan kırk beş guruşu ve devr-i şer‘î ile üzerime ilzâm-ı ribh ben dahi iltizâm ve kabûl eyleyip ciheteyn-i mezkûreynden müdde‘î-i mezbûre zimmetimde vâcibü’l-edâ ve lâzımü’l-kazâ üç yüz kırk beş guruş deynim vardır deyu bizim huzûrumuzda ikrâr ve bizi işhâd dahi etmişdi biz husûsa bu vech üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’l-hâmis aşer min-Zilhicceti’ş-şerîfe li-sene selasîn ve mi’e ve elf Şuhûdü’l-hâl: Mehmed Çelebi b. Ali, es-Seyyid İsmail b. ( ) , Mustafa Efendi b. Mehmed, Mehmed Efendi b. Talib, Mehmed Efendi b. ( ), Abdülgani Çelebi b. Mustafa, Molla Fettah b. Mustafa, İsmail Efendi b. el-Hâc Osman ve gayruhüm