Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 236 Hüküm no: 188 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mustafa b. Hüseyin’in çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-’de Arakıyyecibaşı mahallesinde sâkin iken bundan akdem vefât eden el-Hâc Mustafa b. Hüseyin’in sulbî sagīr oğlu Mehmed ile sulbiye sagīre kızı Rukiye’nin tesviye-i emrlerine bâ-hüccet-i şer‘iyye vasiyy-i muhtârları olan işbu râfi‘u’l-kitâb Mehmed Ağa b. İbrahim meclis-i şer‘-i enverde takrîr-i kelâm ve ta‘bîr ani’l-merâm edip vasîleri olduğum sagīrân-ı mezbûrânın nafaka ve kisve bahâya eşedd-i ihtiyâcları olmağla babaları müteveffâ-yı mezbûrdan müntakil mâllarından her birine kadr-i ma‘rûf nafaka ve kisve bahâ farz ve takdîr olunmak matlûbumdur dedikde vasiyye-i mezbûrun kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın babaları müteveffâ-yı mezbûrdan müntakil mâllarından her birine yevmî sekizer akçe nafaka ve kisve bahâ farz ve takrîr buyurup meblağ-ı mefrûz-ı mezbûru sagīrân-ı mezbûrân Mehmed ve Rukiye’nin nafaka ve kisve bahâlarına harc ve sarfa ve lede’l-iktizâ ve istidâneye ve inde’z-zafer mâllarına rücû‘a vasiyy-i mezbûr Mehmed Ağa’ya izin verilmekle mâ-vaka‘a bi’t-taleb ketbolundu Fi’l-yevmi’s-sânî ve’l-ışrîn min-Zilhicceti’ş-şerîfe li-sene selasîn ve mi’e ve elf Şuhûdü’l-hâl: Mehmed Efendi b. Yusuf, Süleyman Efendi b. Mehmed, Yusuf Ağa b. Mustafa, Ali Çelebi b. Maksud, el-Hâc Mehmed Efendi b. İbrahim, İbrahim b. Mehmed, el-Hâc İbrahim b. Maksud, Mustafa Efendi b. Hüseyin, es-Seyyid Mustafa b. Sefer, es-Seyyid Süleyman b. Mehmed ve gayruhüm