Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 241 Hüküm no: 191 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mustafa b. Hüseyin’in terekesinden oğlunun alacağını talebi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken bundan akdem vefât eden el-Hâc Mustafa b. Hüseyin b. Abdullah’ın hayâtında sâkin olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun sulbî sagīr oğlu Mehmed’in tesviye-i umûruna vasiyy-i muhtârı işbu sâhibü’l-kitâb Mehmed Ağa b. İbrahim meclis-i ma‘kūd-ı mezkûrda müteveffâ-yı mezbûrun bi’l-verâse terekesine vâzı‘atü’l-yed olan vâlidesi Raziye Hatun bt. Abdullah mahzarında bi’l-vesâye üzerine da‘vâ ve takrîr-i kelâm edip vasîsi olduğum sagīr-i mezbûr Mehmed’in bundan akdem fevt olan vâlidesi Hadice bt. Abdullah nâm Hatun’un terekesinden defter-i kassâm nâtık olduğu üzere merkūm Mehmed’e bi’l-irs-i şer‘î isâbet ve intikāl eden elli guruş hissesi sagīr-i mezbûr babası müteveffâ-yı mezbûr el-Hâc Mustafa ahz u kabz edip hatta mütevveffâ-yı mezbûr hâl-i hayâtında ve kemâl-i akl ve sıhhatinde cihet-i merkūmeden sagīr-i mezbûra elli guruş vâcibü’l-edâ lâzımü’l-kazâ deynimdir deyu mahzar-ı Müslimînde ikrâr ve işhâd edip kable’l-edâ fevt olmağla hâl-i müteveffâ-yı mezbûrun tereke-i vâfiyesinden bi’l-vesâye taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûr Mehmed Ağa’dan müdde‘âsı[nı] mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrede Fethiçelebi mahallesi sâkinlerinden Ali Çelebi b. İsmail ve Hasan Çelebi b. Mustafa nâm kimesneler li-ecli’ş-şehâde meclis-i ma‘kūd-ı mezkûra hâzırân olub istişhâd olunduklarında fi’l-hakīka müteveffâ-yı mezbûr el-Hâc Mustafa b. Hüseyin b. Mehmed hâl-i hayâtında ve kemâl-i akl ve sıhhatinde ikrârı mu‘ayyen olduğu hâlde sagīr-i mezbûr Mehmed’in vâlidesi olup bundan akdem fevt olan Hadice Hatun’un terekesinden defter-i kassâm nâtık olduğu üzere sagīr-i mezbûr Mehmed’e elli guruş isâbet ve intikāl eden hissesini ahz u kabz eyleyip meblağ-ı mezbûr hâlâ zimmetimde sagīr-i mezbûra vâcibü’l-edâ ve lâzımü’l-kazâ deynimdir deyu bizim huzûrumuzda ikrâr ve bizi işhâd eyledi biz bu husûsa bu vecih üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm merkūm Mehmed sagīr olmağla tahlîf-i şer‘î bulûğuna ta‘lîk ve meblağ-ı mezbûr elli guruşu sagīr-i mezbûrun vasiyy-i muhtârı müdde‘î-i mezbûr Mehmed Ağa’ya müteveffâ-yı mezbûrun tereke-i vâfiyesinden edâ ve teslîme mezbûre Raziye Hatun’a tenbih eylediği Mevlânâ-yı mezbûr mahallinde ketb ü tahrîr ba‘de ma‘an ba‘s olunan Çukadâr el-Hâc Mustafa b. Mehmed ve es-Seyyid Mustafa b. Sefer Efendi ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Zilhicceti’ş-şerîfe li-sene selasîn ve mi’e ve elf Şuhûdü’l-hâl: Mehmed Efendi b. Yusuf, Süleyman Efendi b. Mehmed, Ali Çelebi b. Maksud, el-Hâc İbrahim b. Maksud, Yusuf Ağa b. Mustafa, Mustafa Ali b. Ali.