Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 255 Hüküm no: 206 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çavuş b. Şaban’ın vefat eden zevcesi Zeynep Hatun ile kızının terekesinden hissesini aldığı Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî-’de Kiremitçi Süleyman Çelebi mahallesinde sâkine iken bundan akdem vefât eden Zeyneb bt. Hasan nâm Hatun’un verâseti sadriye sagīre kızı Âişe bt. Süleyman ile vâlidesi Hadice Hatun bt. el-Hâc Bayram nâm Hatun’a münhasıra olup kable’l-kısme mezbûre Âişe dahi vefât edip verâseti ceddi Hüseyin Çavuş b. Şa‘ban ile ceddesi mezbûre Hadice’ye münhasıra ve tashîh-i mes’elesi sekiz sehimden olup sihâm-ı mezbûreden beş sehmi mezbûr Hüseyin Çavuş’a ve üç sehmi mezbûre Hadice’ye isâbeti tahakkukundan sonra mezbûr Hüseyin Çavuş meclis-i şer‘-i şerîf-i enverde müteveffiye-i mezbûrenin terekesine bi’l-verâse vâzı‘u’l-yed olan işbu sâhibetü’l-kitâb mezbûre Hadice mahzarında ikrâr ve takrîr-i kelâm edip müteveffiye-i mezbûrenin terekesinden tashîh-i mezbûr üzere bana isabet ve intikāl eden hisse-i irsiyye-i şer‘iyyeyi mezbûre Hadice’den taleb ve da‘vâ eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuşdu el-hâletü hâzihi ba‘de tavassut-ı muslihûn şerâit-i sıhhat-i sulhu hâvî mevâni‘-i müfsideden ârî alâ-tarîkı’t-tehârüci’ş-şer‘î mezbûre Hadice benimle husûs-ı mezbûr altı guruş ile bir guruş kıymetli bir altun hâtem üzerine sulh olduğunda ben dahi sulh-ı mezbûru kabûl ve bedel-i sulh olan meblağ-ı mezbûr altı guruş ve bir guruş kıymetli bir hâtemi mezbûre Hadice Hatun yedinden ahz u kabz edip kalîl ü kesîr ve celîl ü sagīr ma‘lûme ve mechûle tereke-i müteveffiye-i mezbûra müte‘allika âmme-i da‘vâ ve mutâlebât-ı eymân ve muhâsamâtdan her birimiz aharın zimmetini ibrâ-i âmm-ı kātı‘ü’n-nizâ‘ ibrâ ve ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sâmin aşer min-Rebî‘i’l-evvel li-sene ihdâ ve selasîn ve mi’e ve elf Şuhûdü’l-hâl: Hüseyin Ağa b. Süleyman, Mustafa Ağa b. Muslu, Abdullah Çelebi b. Muslu, Molla Mustafa b. Ahmed, es-Seyyid Mustafa b. Sefer, Ali Çelebi b. Mustafa, Abdullah Çelebi b. İsmail, İbrahim Beşe b. Ömer ve gayruhüm mine’l-hâzırîn