Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 48 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Osman’ın küçük kızı Emine’ye nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkine iken bundan akdem vefât eden Fâtıma Hatun bt. Osman’ın sadriye sagīre kızı Emine’nin babası ve tesviye-i umûruna vasîsi olan işbu râfi‘u’l-kitâb İsmail Ağa b. Mehmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīre-i mezbûrenin nafaka ve kisve-bahâya eşedd-i ihtiyâcı olmağla vâlidesi müteveffât-ı mezbûreden müntakıl mal-ı mevrûsundan kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin vâlidesi müteveffât-ı mezbûreden müntakıl mâlından beher yevm on akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc ü sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâdî-aşer min-Cumâdelâhire li-seneti seb‘a ve erba‘în ve miete ve elf. Şuhûdü’l-hâl: Eş-şâhidûnü’s-sâbıkūn.